Nën sloganin “Mos ma prek lirinë”, qindra aktivistë, qytetarë, gra dhe vajza të Tiranës iu bashkuan të shtunën paradite marshimit për Ditën Ndërkombëtare të Gruas më 8 Mars.
Ato kërkuan respektimin e të drejtave dhe lirive të tyre, duke bërë thirrje që t’i jepet fund kulturës patriarkale në Shqipëri dhe shtypjes së të drejtave themelore për shkak të gjinisë.
“Jemi mbledhur për të kërkuar atë që na takon. Duam drejtësi sociale, barazi ekonomike dhe dinjitet për të gjitha gratë dhe vajzat,” tha Elkjana Gjipali, një mësuese në protestë.
Përgjatë dekadës së fundit, një grup aktivistesh që advokojnë për të drejtat e grave dhe vajzave në Shqipëri, të njohura si Kolektivi Feminist, e kanë kthyer në traditë marshimimin për të drejtat e grave më 8 Mars.
“Në një shoqëri ku gratë ende nuk janë të sigurta në shtëpi, në punë, në shkolla, spitale apo gjykata, të qëndrojmë të heshtura nuk është një opsion,” u shprehën aktivistet e Kolektivit Feminist.
Protestuesit i thanë BIRN se 8 Marsi nuk është një festë, por një ditë për të ngritur zërin për të drejtat e grave.
“8 Marsi për mua është një luftë e vazhdueshme për lirinë e gruas, barazinë gjinore dhe për mundësi të pafundme për gratë jo vetëm në rolin politik, por edhe ekonomik e shoqëror”, thotë Sonila Sota, aktiviste e të drejtave të njeriut.
Edhe himni i këtij marshimi përcolli mesazhin e këtyre kërkesave nëpërmjet zërave të protestueseve.
“Prapë erdhi 8 Marsi, në rrugë ne po marshojmë, bashkë zërat tonë po ushtojnë. Mblidhuni o gra, mblidhuni o motra, bashkë ne jemi më të forta,” ishin disa prej vargjeve të refrenit të këngës që aktivistet kënduan njëzëri përgjatë marshimit.
“Jemi të lodhura nga kontrolli mbi jetët tona dhe trupat tanë. Nga shtypja, nga varfëria, nga padrejtësia që na detyron të punojmë më shumë për më pak. Nga një sistem që na trajton si të padukshme, që e sheh punën tonë të papaguar në shtëpi si detyrë dhe jo si skllavëri” u shprehën aktivistet e Kolektivit Feminist.
