Organizatat për mbrojtjen e të drejtave të njeriut dënuan të martën vendimin e Këshillit të Ministrave të Republikës së Shqipërisë për mbylljen e plotë të aksesit të shqiptarëve në platformën e medias sociale Tik Tok duke e cilësuar vendimin një “kufizim ekstrem.”
Organizatat reaguan përmes Platformës për Reagim të Shpejtë të Këshillit të Evropës. Njëzet e një organizata nga Shqipëria, rajoni dhe bota firmosën deklaratën, përfshirë BIRN Albania, organizata përgjegjëse për publikimin Reporter.al.
“Ne theksojmë se një ndalim i plotë i aksesit në platformë përbën një kufizim ekstrem të të drejtës për liri shprehjeje dhe për akses në informacion. Pezullimi i plotë i një platforme tejkalon me tepri parimin e proporcionalitetit, duke prekur shprehjen e ligjshme të të gjithë përdoruesve dhe duke kufizuar debatin publik dhe aksesin në burime të larmishme informacioni,” shkruhet në deklaratë.
“Veprime alternative të shënjestruara, të tilla si moderimi i përmbajtjes, verifikimi i moshës dhe programe të edukimit të përdoruesve duhej të ishin eksploruar para vendosjes së një bllokimi total. Kjo masë me natyre tepër të gjerë vendos një precedent të rrezikshëm për ndërhyrje joproporcionale të shtetit te të drejtat digjitale,” thuhet më tej në deklaratë.
Organizatat vërejnë se bllokimi i aksesit në platformë, në këtë periudhë parazgjedhore është “veçanërisht shqetësues” për shkak se dëmton komunikimin e partive politike, veçanërisht me votuesit e rinj si dhe gërryen aftësinë e qytetarëve për të pasur akses në informacion të larmishëm para se të marrin vendimin se për kë duhet të votojnë.
Organizatat vërejnë gjithashtu që ndërhyrja e Ramës në këtë proces ka mungesë akute transparence dhe se procesi, që sipas tij është kryer, ai i konsultimit me 65 mijë prindër dhe mësues, ka mangësi shqetësuese të provave se ka ndodhur dhe që ky proces konsultimi të jetë i vlefshëm, do të duhet të përfshijë të gjithë shoqërinë dhe jo vetëm kategori të caktuara të saj, si prindërit dhe mësuesit.
Organizatat i kërkuan qeverisë shqiptare të heqë dorë dhe të shfuqizojë vendimin për mbylljen e aksesit në Tik Tok.
“Ne i bëjmë thirrje qeverisë së Shqipërisë të tërheqë menjëherë pezullimin e Tik Tok dhe të nisë një proces gjithëpërfshirës dhe transparent konsultimi duke përfshirë parlamentin, shoqërinë civile, organizatat mediatike, avokatët e të drejtave digjitale dhe partnerët ndërkombëtarë,” thotë deklarata.
Kryeministri Edi Rama thotë se dëshiron të mbyllë Tik Tok “për të mbrojtur fëmijët” dhe se mbyllja “do të jetë e përkohshme”.
