Inspektori i Lartë i Drejtësisë, ILD parashtroi të martën më 18 mars para Këshillit të Lartë Gjyqësor kërkimin për caktimin e masës disiplinore “Vërejtje publike” ndaj gjyqtares së Kukësit, Ajshe Xhafa. Sipas ILD, hetimi disiplinor ndaj Xhafës është filluar me iniciativë, bazuar në informacionin e pasqyruar në procesverbalin e një mbledhje të përgjithshme të gjyqtarëve të shtatorit 2024, kur janë zhvilluar debate mbi disa procese pune në gjykatë.
Përfaqësuesit e ILD parashtruan se prej analizës së fakteve ka rezultuar se gjyqtarja Xhafa, në cilësinë e anëtares së trupit gjykues gjatë zhvillimit të një seance publike, ka shkelur rregullat e sjelljes me koleget e saj. Sjellja e Xhafës që ka vijuar gjatë gjithë seancës, vlerësohet prej ILD se ka cënuar besimin e palëve të pranishme në seancë tek drejtësia, se ka diskretituar pozitën dhe figurën e magjistratit, si dhe ka cënuar integritetin dhe reputacionin e gjykatës.
ILD çmon se shkelja disiplinore është kryer me dashje direkte dhe se nisur nga mosnormalizimi i marrëdhënies së Xhafës me dy gjyqtaret e tjera, bën që të mbetet rreziku i sjelljeve trë papërshtatshme në vijim.
Në vijim të parashtrimeve, përfaqësuesja e ILD solli në vëmendje të këshillit se Xhafa ka pranuar se sjellja e saj nuk ka qenë në përputhje me etikën. Ky qëndrim i gjyqtares Xhafa, si dhe faktet se nuk ka pasur shkelje të mëparshme disiplinore dhe se situata ka ndodhur në vitin e parë të punës së saj, vlerësohen prej ILD si rrethana lehtësuese.
Inspektori i Lartë i Drejtësisë konkludon se sjellja dhe veprimet e gjyqtares Xhafa vlerësohen si “Shkelje e lehtë disiplinore” dhe kërkon që ti jepet “Vërejtje publike”.
Gjyqtarja Xhafa paraqiti parashtrimet e saj, duke evidentuar ndër të tjera dhe mungesën e eksperiencës, pasi është e re në detyrë. E pyetur nga anëtarët e Këshillit lidhur me rrethanat e debatit me koleget, nëse kishte kërkuar ose jo të tërhiqeshin në dhomë këshillimi, Xhafa evidentoi se ajo kishte qenë anëtare dhe se ishte kryesuesja e trupës që kishte përgjegjësi për të zbatuar procedurën. Xhafa deklaroi se kishte kërkuar kohë të njihej me dosjen dhe të caktohej një seancë tjetër, duke vlerësuar që të shqyrtonte legjislacionin dhe faktet ligjore të çështjes. E pyetur se si do të vepronte në të ardhmen nëse do t’i nevojitej të njihej me aktet, Xhafa solli në vëmendje se është gjyqtare e re dhe se do të marrë dhe mendimin e kolegëve. Ajo shtoi se nëse do t’i duhet sërish të njihet me dosjen apo legjislacionin do t’i lexojë duke mbajtur shënime, ose do t’ju bëjë foto akteve nga telefoni dhe do t’i studiojë më vonë.
Në përfundim, KLGJ u dha kohë palëve për të përgatitur konkluzionet përfundimtare për t’u paraqitur më datë 2 prill, në orën 14:00, kur u caktua të zhvillohej seanca dëgjmmore e radhës.
