Një seri profilesh dhe faqesh anonime online kanë targetuar prej muajsh drejtuesin politik të Nisma Thurje, Endrit Shabani dhe atë të lëvizjes “Shqipëria bëhet” Adriatik Lapaj, të cilat garojnë së bashku në një koalicion në zgjedhjet e 11 majit.
Profilet në Instagram, Facebook dhe TikTok kanë shpenzuar para për të etiketuar Shabanin si i mbështetur nga “Soros” dhe po ashtu etiketohet Lapaj. Profilet për etiketimet janë të ndryshme. Shabani sulmohet në një profil që emërtohet “Nisma Shthurje” aktiv në Instagram dhe TikTok. Ndërkohë, sulmet ndaj Lapajt, përfshi pamje të krijuara me Inteligjencë Artificiale të përqafimeve të tij me kryebashkikakun Erion Veliaj gjenden në profilin në Tik Tok të emërtuar si “Patriot. Motion”.
Profilet janë anonime dhe pothuajse kanë të njëjtin stil, ndërsa në rrjet gjenden gjurmë të sponsorizimit të tyre edhe pse nuk mund të thuhet se sa është paguar.
Veç faqeve në rrjete sociale, Shabani është targetuar edhe nga një faqe online e prezantuar si faqe lajmesh në domain lajmetroc.al. Në një postim të saj, faqja etiketon dhe insinuon jo vetëm ndaj Shabanit, por edhe disa vajzave, një pjesë e tyre pa profil publik dhe të tjera pjesëtare të Nismës.
Faqja që është krijuar në mes të muajit shkurt është kryesisht e fokusuar në lajme të politikës dhe ka targetuar veç Nismës Thurje edhe Lëvizjen Bashkë dhe kandidatët e saj, duke përdorur po ashtu reklamim online të këtyre postimeve. Faqja që ka publikuar numër kontakti nuk iu përgjigj pyetjeve të BIRN për koment.
Kreu i “Nisma Thurje”, Endrit Shabani i tha BIRN se shumica e postimeve ishin shpifje dhe një pjesë, fyerje banale që merreshin me jetën private. Por ai këmbënguli se pas faqeve anonime fshiheshin struktura të organizuara dhe të mirëfinancuara.
“Ata kanë grafist, kanë staf që ne nuk e kemi për vete, kanë paguar dizajner që monton video që ne se kemi. Na monitorojnë gjithë kohës. Kështu pyetja është kush i ka këto para dhe çfarë interesi ka?”, i tha BIRN në një bisedë telefonike Endrit Shabani.
Shabani tha se logjikisht pas faqeve ishin konkurentë politikë, duke aluduar për partitë e vjetra apo eksponentë të dalë prej këtyre partive që kanë mundësi financiare. “Partitë nënshkruan kod etike për komunik mediatik, po këto parti alokojnë resurse, alokojnë fonde për të shpifur. Nuk e di kush e bën këtë kush i ka këto para dhe mendësi të të bërit politikë”, tha ai.
Sulmet ndaj drejtuesve të Nismës Shqipëria Bëhet përmes profileve anonime nuk janë të vetmet gjatë kësaj fushate elektorale. BIRN ka gjetur më herët faqe të ngjashme që sulmojnë Lëvizjen Bashkë dhe drejtues të saj, Agron Shehajn e Partisë “Mundësia” si dhe kryetarin e Bashkisë së Lezhës, Pjerin Ndreu.
