Kolegji i Posaçëm i Apelimit, KPA u njoh të hënën më 7 prill me konkluzionet përfundimtare në çështjen e prokurorit të Tiranës, Hysni Mulaj, lidhur me pretendimet e ngritura në ankimin e ish-Komisioneres Publike, Irena Nino që kërkoi shkarkimin e këtij subjekti rivlerësimi me argumentin se nuk arrin nivel të besueshëm në kriterin e pasurisë. Në fund të shqyrtimit të çështjes në Kolegj, pas administrimit të provave të reja të dorëzuara nga prokurori Mulaj gjatë parashtrimeve, si dhe të shpjegimeve të tij, prokurori Klodian Braho që përfaqëson drejtuesin e SPAK në këtë çështjeje, ndryshoi qëndrim duke kërkuar lënien në fuqi të konfirmimit të subjektit të rivlerësimit. Po ashtu, prokurori Hysni Mulaj kërkoi përmes avokates së tij, Romina Zano, lënien në fuqi të vendimit të Komisionit të Pavarur të Kualifikimit, KPK.
Hysni Mulaj u konfirmua në detyrë nga Komisioni i pavarur i Kualifikimit në 8 qershor 2022. Në fillim KPK e gjeti Mulajn në pamundësi financiare për të mbuluar shpenzimet, kursimet dhe blerjen e një apartamenti. Ky konstatim paraprak erdhi pasi babai i tij u gjet në pamundësi për dhënien e një huaje prej 4 milionë lekësh dhe një dhuratë në shumën 500 mijë lekë, të deklaruara si burime për apartamentin.
Mulaj i kundërshtoi gjetjet e KPK duke këmbëngulur të uleshin shpenzimet, të konsideroheshin të ardhurat nga bujqësia, ato nga një aktivitet bar-kafe e prindërve, të ardhurat e vëllezërve nga emigracioni, si dhe kontributi i tij në familjen e origjinës, duke argumentuar se kanë jetuar të gjithë së bashku dhe të ardhurat menaxhoheshin nga i ati. Në përfundim të hetimit administrativ, KPK konkludoi se Mulaj rezultoi me një bilanc negativ prej 1.5 milion lekësh, i shpërndarë në 4 vjet, që u konsiderua i pamjaftueshëm për të sjellë penalizim
Vendimarrja e KPK nuk u gjet e drejtë nga ish-komisonerja Nino, e cila pretendoi se Komisioni kishte vlerësuar gabim gjendjen e pasurive dhe mundësive financiare të subjektit. Sipas saj, prindërit e Mulajt nuk kanë pasur të ardhura të mjaftueshme për të justifikuar huanë dhe dhurimin. Po ashtu, ajo vlerësoi se konkluzioni i Komisionit në lidhje me të ardhurat e të afërmve të subjektit nga emigracioni bie ndesh me precedentët e vendosur tashmë nga KPA. Sipas ish-Komisioneres Publike, Mulaj nuk ka dëshmuar ligjshmërinë e të ardhurave nga emigracioni, si dhe të ardhurave të prindërve nga bujqësia e aktiviteti tregtar.
Gjatë paraqitjes së parashtrimeve më 2 prill, prokurori Braho tha se u qëndronin gjithë shkaqeve të ankimit, duke e cilësuar përfundimin e Komisionit për burimet e apartamentit të konkluduar në vlerësim jo të drejtë të provave të administruara dhe të legjislacionit për vetingun e magjistratëve. Avokatja Romina Zano i kundërshtoi shkaqet e ankimit si të pabazuara dhe tha se kishin paraqitur fakte të reja shkresore që vërtetojnë burimet ndaj të cilave ngrihen pretendime.
Ndërsa gjatë konkluzioneve përfundimtare, Braho u shpreh se pretendimet e ngritura në shkaqet e ankimit ishin ezauruar gjatë shqyrtimit të çështjes në Kolegj. Ai paraqiti rezultate të reja të analizës financiare, të konkluduara bazuar dhe në provat e reja të dorëzuara prej subjektit për të ardhurat nga emirgacioni dhe të ardhurat e tjera, duke konstatuar se bilanci negativ që mbetet nga analiza e përgjithshme, është i pamjaftueshëm për të cënuar vendimin e Komisionit. Në përfundim, Braho kërkoi lënien në fuqi të konfirmimit të prokurorit Hysni Mulaj.
Përfaqësuesja ligjore e Mulajt, avokatja Romina Zano paraqiti në mënyrë të përmbledhur konkluzionet përfundimtare dhe kërkoi po ashtu lënien në fuqi të vendimit të KPK. Prokurori Hysni Mulaj deklaroi se nuk kishte ndonjë gjë për të shtuar.
KPA u tërhoq për vendim, që u njoftua se do të shpallet më datë 5 maj, në orën 12:00.
