Gjykata e Beratit ka pranuar një kërkesë të prokurorisë për pezullimin nga detyra të drejtorit të Agjencisë së Mbikëqyrjes Policore, Florian Sulejmani, pasi është nën hetim për shpërdorim detyre lidhur me procedurën e ndjekur në transferimin e oficerëve të policisë gjyqësore, që dyshohet se është kryer në kundërshtim me legjislacionin përkatës.
Prokuroria e Beratit njoftoi të mërkurën m 16 prill caktimin e masës së sigurimit personal “Pezullimi i ushtrimit të një detyre a shërbimi publik” ndaj drejtorit të Përgjithshëm të Agjencisë së Mbikëqyrjes Policore, AMP, Florian Suljemani, në kuadër të një procedimi penal të regjistruar ndaj tij për veprën penale “Shpërdorimi i detyrës”. Sipas prokurorisë, çështja penale në ngarkim të Sulejmanit ka të bëjë me transferimin e vartësve të Sulejmanit.
Në njoftim thuhet se gjykata ka konfirmuar ekzistencën e dyshimit të arsyeshëm se nga ana e Sulejmanit janë transferuar oficerët e policisë gjyqësore në kundërshtim të plotë me parashikimet ligjore të ligjeve “Për Organizimin dhe Funksionimin e Policisë Gjyqësore”, dhe për “Për Agjencinë e Mbikëqyrjes Policore’’.
Po ashtu, sipas organit të akuzës ekzistojnë shkaqe të rëndësishme që vënë në rrezik marrjen ose vërtetësinë e provës. Për këto arsye është vlerësuar që të kërkohet masa ndaluese ndaj Sulejmanit, që konsiderohet se garanton një raport të drejtë midis rëndësisë së faktit dhe sanksionit që parashikohet për veprën penale konkrete, me llojin e masës së sigurimit.
I kontaktuar nga BIRN, drejtori i Agjencisë së Mbikëqyrjes Policore, Florian Sulejmani nuk komentoi vendimin.
