Vasili do të drejtojë operatorin publik me një mandat pesëvjeçar. Procesi i votimit ishte i fshehtë, ndërsa e gjithë procedura u transmetua live në RTSH.
Vasili mori 7 vota nga 11 anëtarë të Këshillit, ndërsa 3 vota shkuan për kandidaten Zoje Jakaj dhe 1 votë për Engjëll Musain.
Gara u zhvillua mes tre kandidatëve me më shumë vota që dolën nga raundi i parë i votimit të enjten, ku Vasili kishte 5 vota.
“Votimi i dytë rezulton të jetë i suksesshëm, pasi arrin të realizojë nevojën statutore për zgjedhjen e Drejtorit të Përgjithshëm prej 3/5 të anëtarëve të Këshillit Drejtues,” tha në fund të procesit kryetari i Këshillit Drejtues, Fatjon Hoxhalli.
Në garën për postin e drejtuesit të operatorit publik morën pjesë 12 kandidatë, të cilët në një mbledhje të mëparshme publike të Këshillit patën mundësinë të paraqisnin publikisht platformat dhe vizionin e tyre.Vasili ka një karrierë të gjatë si gazetare dhe prej vitesh është moderatore e një emisioni debati politik.
Paraardhësi i saj, Alfred Peza, u kontestua si njeri politik për shkak të së shkuarës si deputet dhe drejtues politik në Partinë Socialiste. RTSH ka qenë në qendër të debatit publik prej më shumë se një viti, pas dorëheqjes së Pezës i cili u përball me kritika për shkarkime masive nga puna të gazetarëve dhe punonjësve të këtij institucioni gjatë vitit që mbajti detyrën.
Një proces i mëparshëm për zgjedhjen e drejtorit të ri u kontestua fort nga dy partitë e mëdha politike, të cilat, nëpërmjet Komisionit Parlamentar për Median dhe Edukimin, ndërmorën dhe aktin e paprecedentë të shkrirjes së Këshillit Drejtues në mars të këtij viti.
Parlamenti votoi më pas përbërjen e Këshillit të ri Drejtues, duke zgjedhur në këtë institucion individë të lidhur ngushtësisht me politikën, gjë që shqetësoi organizatat që mbrojnë lirinë e medias dhe së fundmi edhe Bashkimin Europian.
