Policia e Shtetit njoftoi të hënën se kishte zbuluar një skemë mashtrimi financiar, ku kanë rënë pre qindra qytetarë shqiptarë. Autor i mashtrimit sipas policisë ishte një 23 vjeçar me shtetësi franceze.
“Kapet në flagrancë në një bankomat në Tiranë një 23 vjeçar nga Franca, duke tërhequr para nga një llogari që e kishte marrë nëpërmjet linkut,” njoftoi policia.
Sipas njoftimit të policisë, 23-vjeçari francez u dërgonte qytetarëve shqiptarë linqe të rreme nëpërmjet mesazheve të kamufluara si banka të nivelit të dytë në Shqipëri. Pasi qytetarët klikonin këto linqe, atyre u kërkohej plotësimi i formularëve me të dhëna personale bankare, të cilat më pas 23-vjeçari i përdorte për të tërhequr para nga bankomatet ATM.
Pas denoncimeve të qytetarëve, ai u identifikuar nga Policia e Shtetit dhe u arrestua me akuzën e “mashtrimit kompjuterik” dhe “ndërhyrjes në të dhënat kompjuterike”.
Sipas policisë, 23-vjeçari e kishte hapur linkun në Francë dhe kishte ardhur në Tiranë me qëllim tërheqjen e parave nga llogaritë bankare që kishte përfituar nëpërmjet mashtrimit.
