Një punonjës i Operatorit të Shpërndarjes së Energjisë Elektrike mbeti i vrarë të enjten në Mirditë, ndërsa dy kolegë të tij mbetën të plagosur, gjatë kryerjes së punimeve për furnizimin me energji të një qendre votimi në afërsi në godinës së ish-shkollës në Kodër-Rrëshen.
Viktima u identifikua si Emiljano Bunga, 37 vjeç, ndërsa të plagosurit janë dy kolegët e tij Zef Paçuku 60-vjeç dhe Tonin Dushi 58-vjeç, të cilët pësuan dëmtime të lehta dhe u transportuan menjëherë për ndihmë mjekësore në Spitalin e Mirditës.
Menjëherë pas ngjarjes, forcat e policisë dhe grupi hetimor shkuan në vendngjarje për të kryer veprimet procedurale. “Po punohet për të përcaktuar nëse kanë ndodhur shkelje të protokolleve të sigurisë teknike gjatë punimeve, dhe për të identifikuar shkaqet e sakta që çuan në këtë aksident në punë me pasoja fatale”, njoftoi policia.
Nga të dhënat paraprake bëhet e dije se tre punonjësit e OSHEE kanë qenë duke punuar në një shtyllë të tensionit të lartë, për të lidhur energjinë në qendrën e votimit.
Ky është aksidenti i dytë me pasojë vdekjen e një punëtori në sektorin e energjisë në më pak se 30 ditë. Dy viktima të tjera në punë janë numëruar në ndërtim dhe në miniera, ndërsa fati i Ardit Beshirit një ekskavatorist i ri, i cili u mbulua nga rrëshqitja e dheut ndërsa punonte pranë një fabrike të pasurimit të kromit është ende i paditur. Kërkimet për të kanë dështuar për disa ditë me radhë.
