Vetëm pesë orë na ndajnë nga mbyllja e kutive të votimit për zgjedhjet parlamentare por pjesëmarrja e deritanishme, 30.3% e listës deri në orën 14.00, rezulton shumë më e ulët se sa në të njëjtën orë të zgjedhjeve parlamentare të vitit 2021.
Të dhënat e Komisionit Qendror të Zgjedhjeve të analizuara nga BIRN tregojnë se në orën 14 të ditës së zgjedhjeve 2021 patën votuar 35.6% e shtetasve ndërsa pjesëmarrja ra në 30.3% këtë të dielë.
Tirana është qarku me pjesëmarrjen më të lartë deri tani, 34.7%, pjesëmarrje që gjithsesi është më e ulët se sa katër vjet më parë ndërsa qarku i Vlorës shënon pjesëmarrjen më të ulët në 21.3%.
Të gjitha qarqet e vendit shënojnë rënie në krahasim me katër vjet më parë por rënia është më e fortë në Qarkun Elbasan, minus 6.6% dhe në Qarkun Dibër, 6.56%.
Qarku me rënien më të ulët është Lezha me 3.1%.
Pjesëmarrja në zgjedhjet parlamentare në Shqipëri ka qenë historikisht e ulët për shkak të masës së lartë të emigrimit. Në zgjedhjet e vitit 2021, morën pjesë në votime 46.3% e qytetarëve me të drejtë vote. Nëse ecuria e ditës së sotme nuk ndryshon deri në mbylljen e kutive, pjesëmarrja brenda vendit mund të bjerë në 41%, gjë që do të thotë se pak më shumë se sa 1.42 milionë nga 3.47 milionë qytetarë me të drejtë vote brenda vendit do të kenë votuar.
Rreth 188 mijë qytetarë ndërkohë kanë votuar përmes postës. Projeksioni i pjesëmarrjes brenda vendit dhe votat nga emigrantët bashkërisht bëjnë 1.61 milionë vota, gjë që do të thotë që, edhe me votat e emigrantëve, pjesëmarrja do të jetë më e ulët se sa katër vjet më parë.
