Minatori Saimir Bego, 57 vjeç, humbi jetën të hënën si pasojë e shembjes së një masivi minerali që e goditi në kokë gjatë punës. Policia njoftoi se ngjarja ka ndodhur në momentin e ndërrimit të turnit, kur një masiv minerali u shkëput nga tavani i galerisë.
“Rreth orës 18:00, në fshatin Katjel, Prrenjas, dyshohet se gjatë punës në minierën e kromit ka rrëshqitur një masiv minerali dhe, për pasojë, ka humbur jetën shtetasi S. B., 57 vjeç”, njoftoi policia.
Administratori i minierës, Gëzim Balla, në përgjigje të pyetjeve nga mediat, tha se ishte shembur tavani i galerisë dhe pretendoi se masat e sigurisë në punë ishin marrë.
“Sot në mesditë, të gjitha përgatitjet për rifillimin e punës ishin kryer. Aksidenti ka ndodhur pak më pas, në momentin kur një pjesë e tavanit të galerisë është shembur papritur. Një masiv shkëmbor ka goditur në kokë minatorin, i cili ka ndërruar jetë menjëherë,” shpjegoi ai.
Siguria në punë mbetet një nga problemet më shqetësuese në Shqipëri, sidomos në sektorë si ndërtimi, minierat dhe energjia elektrike. Tetë punëtorë kanë humbur jetën në detyrë në më pak se dy muaj në vend.
Dy të rinj u vranë në kantierin e ndërtimit të një HEC-i në Gramsh, dy elektricistë humbën jetën gjatë riparimeve në rrjet në Mirditë dhe Divjakë, një ekskavatorist u vra pas një rrëshqitje toke në Klos. Po ashtu, brenda më pak se një muaji u vranë në detyrë një minator në Martanesh dhe një punëtor ndërtimi në Qerret të Kavajës.
