Prokuroria e Posaçme kundër Korrupsionit dhe Krimit të Organizuar, SPAK njoftoi të martën më 3 qershor gjatë një konference për shtyp me gazetarët rezultatet e një operacioni antidrogë, të kryer në bashkëpunim me autoritetet e drejtësisë finlandeze pas një hetimi të përbashkët dyvjeçar. Sipas prokurorëve të SPAK dhe homologëve të tyre finlandez, operacioni i kryer në territorin shqiptar për ndalimin e 11 personave që dyshohen si drejtues të katër organizatave kriminale me veprimtari në trafikimin dhe shitjen e lëndëve narkotike, është konkluduar me ndalimin e 9 prej të hetuarve. Ndërkohë, u tha se po vijon puna për kapjen e dy personave të tjerë, një prej të cilëve dyshohet se gjendet jashtë Shqipërisë.
Drejtori i i hetimit të krimit të organizuar në Policinë e Shtetit, Edmond Rizaj e cilësoi operacioin me vështirësi mesatare. Ai vërejti se përfshirja e punonjësve të policisë në hetimin e kësaj çështjeje e kishte bërë më të lehtë ekzekutimin e masave të sigurimit.
Gjatë konferencës u bë me dije se hetimi nga prokuroria shqiptare ka filluar bazuar në informacionet e autoriteve të drejtësisë finlandeze. Në Finlandë janë ndaluar dhe dënuar 55 persona të tjerë, që kanë qenë të përfshirë në trafik e shitje të lëndëve narkotike, 10 prej të cilëve shtetas shqiptarë, ndërsa të tjerët finlandezë, polakë, rumunë e nga vende aziatike.
Sipas SPAK, nga hetimet e deritanishme rezulton se drejtuesit e katër organizatave me origjinë nga Vlora, Berati e Kuçova, bënin një jetë normale në Shqipëri. Po ashtu, ka rezultuar se ata nuk kanë pasur precedentë penalë në vendin tonë. Prokurorët shpjeguan se drejtuesit e organizatës, disa prej të bcilëve kishin jetuar me parë në Finlandë, organizonin gjithë veprimtarinë, nga sigurimi i lëndës narkotike në Spanjë e në Holandë, trafikimin përmes kamionëve apo rrugëve postare, si dhe shitjen në tregun finlandez. Cannabis sativa sigurohej në Spanjë, ndërsa drogërat sintetike në Holandë. Nga 300 kilogramë të sekuestruara gjatë viteve të fundit, 10 kanë qenë kokainë, rreth 100 kg cannabis sativa dhe pjesa tjetër drogëra sintetike. Organizatorët e trafikut rezulton të jenë kujdesur që shitësit që mbërrinin nga Shqipëria, të kishin gati strehimin dhe shpenzimet e jetesës në Finlandë, duke u futur menjëherë në aktivitetin e shpërndjarjes së lëndëve narkotike.
Prokuroria tha se këto katër grupe rezulton të kenë bashkëpunuar me njëri-tjetrin për mundësimin e kryerjes së këtij aktiviteti të paligjshëm. Sipas SPAK, hetimet janë ende duke vijuar, ndërkohë që do të kryhet edhe hetimi pasuror për personat që janë proceduar penalisht.
