Prokuroria e Lezhës përfundoi hetimet dhe dërgoi për gjykim çështjen penale nr. 332/ 2024 në lidhje me kultivimin e bimëve narkotike në zonën e Kashnjetit, ku janë marrë të pandehur tre persona, mes të cilëve edhe Armando Ndreca, 30 vjeç- vëllai i deputetit të Partisë Socialiste, Eduard Ndreca. Dy të pandehurit e tjerë janë Armel Nikdukaj dhe Elvis Spellzaj.
Prokuroria e Lezhës i akuzon ata për veprat penale “Prodhimi dhe shitja e lëndëve narkotike”, “Kultivimi i bimëve narkotike” dhe “Vjedhja e energjisë elektrike ose impulseve telefonike”. Seanca paraprake gjyqësore do të zhvillohet në ditët në vijim nga gjyqtari Lirim Bulica, i cili do të vendosë ndaj kërkesës së prokurorisë për kalimin e çështjes në gjykim.
Sipas dosjes hetimore të prokurisë, Ndreca dhe dy të rinjtë kishin përshtatur një stan për kultivimin e drogës pranë fshatit Kashnjet. Gjatë operacionit të policisë u sekuestruan 2973 bimë kanabis sativa, disa prej të cilëve fidanë të gatshëm për t’u mbjellë, një sasi kanabisi, 50 llampa, pajisje ventilimi si dhe sende të tjera që i shërbejnë veprimtarisë kriminale.
Ndërkohë, përveç Prokurorisë së Lezhës, Armando Ndreca është i proceduar edhe nga Prokuroria e Posaçme për kultivim të bimëve narkotike në kuadër të operacionit “Revanshi”. Ndreca ndodhet aktualisht në paraburgim.
