Prej vitit 2020, televizioni “Ora” – dikur në pronësinë familjare të Ylli Ndroqit – menaxhohet nga Agjencia e Administrimit të Pasurive të Sekuestruara dhe Konfiskuara, pas peripecive ligjore që sollën sekuestrimin dhe më pas kalimin e pronësisë në favor të shtetit shqiptar.
Por gazetarët dhe punonjësit e tjerë pranë këtij televizioni kanë zbuluar së fundmi se Agjencia nuk u ka paguar kontributet e sigurimeve shëndetësore dhe shoqërore përgjatë tre viteve të fundit, ndonëse janë paguar rregullisht dhe kanë qenë të deklaruar në sistemin tatimor.
Përmes një deklarate, Asociacioni i Gazetarëve të Shqipërisë denoncoi të premten ato që i konsideroi paligjshmëri gjatë administrimit shtetëror të kompanisë, përfshirë edhe ndërprerjet kolektive të kontratave të punës.
Sipas AGSH, nga dokumentacionet dhe dëshmitë e punonjësve të larguar nga puna rezulton se “pushimi i tyre nga puna është kryer në shkelje të hapur të Kodit të Punës dhe pa ndjekur procedurat ligjore për pushim kolektiv”.
Po ashtu, për këta punonjës AAPSK nuk ka derdhur kontributet e sigurimeve shoqërore dhe shëndetësore për periudhën 2022–2025.
“Administratorët në përfaqësim të shtetit shqiptar kanë dështuar të përmbushin detyrimin për të garantuar funksionimin ligjor, etik dhe transparent të një pasurie të sekuestruar dhe të menaxhuar në emër të publikut,” tha Asociacioni i Gazetarëve të Shqipërisë në një deklaratë për shtyp.
“AGSH kujton se mediat, pavarësisht statusit juridik apo pronësisë, janë pjesë e interesit publik dhe të drejtat e gazetarëve dhe punonjësve të medias janë të pandashme nga standardet themelore të të drejtave të njeriut dhe lirisë së shprehjes,” shtohet në deklaratë.
Gazetarët e pushuar nga puna pretendojnë se veprimet dhe mosveprimet institucionale përbëjnë jo vetëm shkelje të legjislacionit të punës, por edhe një sinjal alarmi për abuzimin me pasuritë e sekuestruara në emër të shtetit dhe përdorimin e tyre në mënyrë arbitrare ndaj qytetarëve. AAPSK nuk ka mbajtur një qëndrim publik për pretendimet e gazetarëve të Ora TV dhe ishte e pamundur për t’u kontaktuar deri në botimin e këtij shkrimi.
Asociacioni i Gazetarëve kërkon nga institucionet publike që të nisin një hetim administrativ për shkeljet e raportuara, audit të plotë të pagesave dhe kontributeve të prapambetura në emër të punonjësve dhe garantimin e përfshirjes ligjore të punonjësve si kreditorë të privilegjuar në çdo procedurë falimentimi në zhvillim. AGSH nxit gjithashtu Komisionerin për Mbrojtjen nga Diskriminimi, për të hetuar nëse largimet kanë qenë të motivuara nga qëndrime kritike apo bindje politike.
Televizioni Ora ishte në pronësi të Ylli Ndroqit deri në vitin 2020, kur me vendim të Prokurorisë së Posaçme, SPAK, u vendos sekuestrimi mbi të dhe pasuri të tjera të Ndroqit, pasi “perandoria e biznesit” të tij dyshohet se i ka rrënjët tek përfshirja në të shkuarën në trafikun e drogës në Shqipëri, Turqi dhe Itali.
