Nëpërmjet disa postimeve në grupin e hapur në Telegram, “Homeland Justice” pretendon se ka kryer të premten një sulm kibernetik ndaj faqes zyrtare të Bashkisë së Tiranës në internet. Në postime, “Homeland Justice” thotë se “Bashkia Tiranë është e jona” dhe se “shërbimet për qytetarët janë ndërprerë”.
“Homeland Justice” ka kryer sulme të njëpasnjëshme ndaj institucioneve të ndryshme shtetërore në Shqipëri që prej tetorit të vitit 2022, duke nxjerrë të dhëna sensitive të zyrtarëve shteterorë dhe autoriteteve publike, si dhe të dhëna personale të qytetarëve.
Sipas disa raporteve të Microsoft dhe FBI në vitin 2024, pas tyre dyshohet se fshihen hakera me origjininë iraniane.
Faqja e internetit të Bashkisë Tiranë është aktualisht e paarritshme, teksa në postimet e tyre të fundit në grupin “Homeland Justice” në Telegram është shfaqur një listë me fjalëkalime të administratorëve të Bashkisë. Në postimet e saj, “Homeland Justice” e justifikon sulmin kibernetik me akuzat e përsëritura ndaj liderëve shqiptarë për strehimin në Shqipëri të organizatës së Muxhahedinëve të Popullit të Iranit, MEK, dhe pajisjen e tyre me dokumente identifikimi dhe pasaporta.
Bashkia e Tiranës nuk ishte e arritshme nga BIRN deri në publikimin e këtij shkrimi.
