Një 66-vjeçar punëtor ndërtimi u vra të hënën pasdite në Berat, pasi ra nga lartësia e ndërtesës ku punonte. Sipas policisë, ngjarja ndodhi rreth orës 15:30 në lagjen “Kushtrimi”, ku Ramadan Hatija, banues në Berat, dyshohet se ra nga kati i tretë i një pallati në ndërtim. Ai u dërgua me urgjencë në Spitalin Rajonal të Beratit në gjendje të rëndë, por fatkeqësisht ndërroi jetë për shkak të plagëve të marra.
Grupi hetimor në vendngjarje, nga dëshmitë e punonjësve të tjerë, mësoi se 66-vjeçari po punonte në armaturën e objektit dhe ra nga lartësia, duke pësuar dëmtime fatale në kokë dhe trup për shkak të mungesës së mjeteve mbrojtëse.
Policia e Beratit bëri të ditur se, pas verifikimeve paraprake, aksidenti ka ndodhur për shkak të shkeljes së rregullave të mbrojtjes në punë. Për këtë arsye, u shpall në kërkim administratori i firmës së ndërtimit.
“U shpall në kërkim administratori i firmës së ndërtimit, shtetasi me inicialet T. N., 65 vjeç, si dhe nisi procedimi në gjendje të lirë për teknikun e ndërtimit shtetasin me inicialet S. B., 69 vjeç, për shkelje të rregullave të mbrojtjes në punë”, tha policia e Beratit.
Ngjarje të ngjashme me pasoja fatale për shkak të mungesës së masave të sigurisë në vendin e punës janë shtuar vitet e fundit në Shqipëri, ndërsa sektori i ndërtimit dhe ai minerar mbeten ndër më problematikët për zbatimin e standardeve të sigurisë. Vetëm në 3 muajt e fundit 9 persona kanë humbur jetë në punë në të gjithë vendin.
