Kuvendi miratoi të enjten me 71 vota pro dhe asnjë kundër Strategjinë Kombëtare kundër Ndërhyrjeve të Huaja dhe Dezinformimit, një angazhim i ri i institucioneve shqiptare për të ndërmarrë një plan masash për të luftuar ndërhyrjen e huaj keqdashëse në sektorë të rëndësishëm të vendit.
Dokumenti parashikon disa objektiva kryesorë në luftën kundër dezinformimit dhe ndërhyrjes së huaj dhe sektorët ku do të ndërhyhet me ndryshime ligjore dhe mekanizma mbrojtës si zgjedhjet, mediat, strukturat e Teknologjisë së Informacionit, etj.
Strategjia e shoqëruar me një plan veprimi u hartua nga Komisioni i Posaçëm anti-dezinformim që u drejtua nga deputeti socialist Erjon Braçe, puna e të cilit u bojkotua nga opozita.
Gjatë prezantimit të strategjisë në seancën e fundit plenare të legjislaturës 2021–2025, Braçe tha se ky angazhim vinte si një nevojë për të rritur sigurinë kombëtare pas sulmeve kibernetike që vendi ynë pësoi vitet e fundit dhe nga angazhimi në plotësimin e standardeve të Bashkimit Europian e partnerëve të tjerë ndërkombëtarë në këtë drejtim.
Katër objektiva kryesore të kësaj strategjie synojnë: ngritjen e kapaciteteve institucionale për të parandaluar ndërhyrjet e huaja në fushatat zgjedhore; mbrojtjen e sigurisë kombëtare nga këto ndërhyrje nëpërmjet forcimit të partneritetit me NATO-n, BE-në dhe aleatët; mbrojtjen e ekonomisë kombëtare dhe sektorëve të tjerë kritikë nga penetrimi i financimeve të huaja jomiqësore; dhe së fundi orientohen në mbrojtjen dhe forcimin e lirisë së shprehjes dhe lirisë së medias, duke mbështetur gazetarinë investigative në evidentimin e këtyre fenomeneve.
“Ngjarjet kanë treguar se Shqipëria është bërë objekt i vazhdueshëm i ndërhyrjeve të huaja dhe dezinformimit, ndaj del nevoja për masat parandaluese edhe me kontributin e partnerëve europianë” – tha ndër të tjera ai, duke theksuar se zbatimi i planit të veprimit nga ana e Këshillit të Ministrave do të monitorohet sërish nga Kuvendi nëpërmjet një komisioni të posaçëm.
Strategjia dhe qëllimi i punës së komisionit nuk u mbështetën nga opozita, e cila aludoi se dokumenti, pavarësisht angazhimeve në dukje për të luftuar dezinformimin, fshihte në fakt qëllimin e qeverisë socialiste për të cënuar lirinë e medias dhe lirinë e shprehjes në tërësi.
Kryetarja e Komisionit për Edukimin dhe Mediat, Ina Zhupa, tha se “objektivat klishe bëhen për të fshehur qëllimin e ngritjes për të kontrolluar pushtetin e pavarur mediatik”.
Komisioni i posaçëm kundër dezinformimit u ngrit me synimin për rishikimin e kuadrit ligjor për parandalimin e ndërhyrjeve të huaja në proceset demokratike dhe në proceset zgjedhore në të ardhmen. Puna e komisionit u bojkotua nga opozita parlamentare, por ai vijoi në mënyrë të njëanshme dhe realizoi seanca dëgjimore me një sërë institucionesh publike dhe aktorë të shoqërisë civile, duke dalë në përfundim me një strategji kombëtare.
