Kolegji i Posaçëm i Apelimit dëgjoi të mërkurën qëndrimet përfundimtare të palëve në ankimim e Komisionerit Publik ndaj prokurores Eranda Laze. Filimisht në seancë, prokurori Adnan Xholi i autorizuar nga kreu i SPAK iu përgjigj pyetjeve nga relatori.
Më pas, palët lexuan konkluzionet përfundimtare. Xholi në qëndrimin e tij kërkoi shkarkimin e Lazes, duke referuar problemet e gjetura në kriterin e pasurisë. Xholi këmbënguli se bashkëshorti nuk kishte pasur mjaftueshëm të ardhura për kursimet në blerjen e një apartamenti.
Ai vuri në dukje probleme në disa vite dhe arsyetoi se subjekti kishte deklarime të pasakta apo kishte dhënë argumente vetëm pas pyetjeve të ngritura në rivlerësim.
Prokurorja Laze kundërshtoi qëndrimin duke e cilësuar atë pa argumente. Ajo vuri në dukje se një pjesë e problemeve lidheshin me pasuri para martese, megjithatë arsyetoi se bashkëshorti dhe familja e tij i kishin pasur mundësitë për të kursyer shumat e përdorura në investime.
Laze referoi disa detaje të çështjes. Ajo këmbënguli se disa transferta bankare, të ngrituara si problem, nuk ishin bërë prej tyre dhe se në atë kohë kishin qenë jashtë vendit.
Ajo preredoi se pasuria nuk ishte fshehur, nuk kishte probleme dhe vinte nga burime të ligjshme. Laze po ashtu këmbënguli se nuk kishte as probleme të figurës dhe etikës. Ajo kërkoi lënien në fuqi të vendimit të Komisionit.
Pasi dëgjoi palët KPA vendosi të shpallë vendimin më 29 korrik.
Laze u konfirmua në detyrë nga Komisioni i Pavarur i Kualifikimit, KPK më 8 nëntor të vitit të kaluar. Gjatë hetimit administrativ në KPK, ajo e kundërshtoi bilancin negativ në masën 10 milionë lekë, si dhe gjetjet për udhëtime me persona të përfshirë në krimin e organizuar, duke kërkuar konfirmimin. Shumica e trupës së KPK i gjeti bindëse shpjegimet dhe provat e dorëzuara nga subjekti, duke e reduktuar pamundësinë në rreth 1.5 milionë lekë, që u konsiderua në përfundim jo penalizuese.
Ndërsa pakica çmoi se Laze nuk arriti të provojë ligjshmërinë e burimeve për dy apartamente banimi në Tiranë, të blera për vlerën 81,284 Euro dhe të një automjeti.
Vendimi i shumicës së Komisionit u gjet i pabazuar dhe nga Operacioni Ndërkombëtar i Monitorimit, që pasi evidentoi probleme për pasurinë dhe etikën, u kërkoi Komisionerëve Publikë përmes një rekomandimi, që të ushtronin ankim në Kolegj.
