Në një takim të mbyllur me drejtuesit politikë të qarqeve ditën e hënë, kryeministri Edi Rama propozoi që nëpër bashkitë e vendit të ngrihen zyra të posaçme për të ndihmuar qytetarët me shërbimet e platformës elektronike qeveritare “e-albania”.
Kryeministri kërcënoi gjithashtu që zyrat e avokatisë dhe të noterisë që ofrojnë shërbime me pagesë do t’u hiqej licensa, pasi këto shërbime supozohet që të ofrohen falas për qytetarët.
Komisioneri kundër Diskriminimit, Robert Gajda i tha BIRN se disa prej vendimeve të institucionit që ai drejton lidhen pikërisht me mungesën e aksesit që insitucionet shtetërore kanë ndaj qytetarëve për aksesimin e shërbimeve digjitale.
“Ka një numër të konsiderueshëm qytetarësh që nuk kanë arritur të marrin shërbimet në institucionet shtetërore shqiptare, pikërisht për shkak të mungesës së dokumentacionit që merret vetëm në mënyrë digjitale,” tha Gajda.
“Në vendimet tona, ne kemi konstatuar raste diskriminimi për shkak aftësive digjitale, të moshës, kryesisht ndaj qytetarëve të moshës së tretë, për shkak të arsimit, apo edhe ndaj atyre me probleme ekonomike të cilët nuk kanë mundësi aksesi në shërbimet digjitale,” shtoi ai.
Prej majit të vitit 2022, kur kryeministri Rama njoftoi kalimin e 95% të shëbimeve të sektorit publik online nëpërmjet platformës qeveritare “e-albania”, biznese apo zyra private që ofrojnë asistencë me përdorimin e kësaj platforme kudrejt pagesës kanë lulëzuar në masë në vend.
Moshat e treta, personat me arsim të ulët apo ata me vështirësi financiare e kanë shpeshherë të pamundur aksesin në internet, e si pasojë edhe në shërbimet digjitale për dokumentet shtetërore. Ata kanë nevojë të shtuar për asistencë në përdorimin e këtyre shërbimeve në rrjet, ndaj shpeshherë janë detyruar t’u drejtohen zyrave që ofrojnë këto shërbime kundrejt pagesës.
Komisioneri për Mbrojtjen nga Diskriminimi, Gajda theksoi për BIRN se raportimet e abuzimeve janë kryesisht ndaj bizneseve private që ofrojnë shërbimet e “e-albania” kundrejt pagesës, teksa shtoi se nuk kanë patur deri tani sinjalizime për zyra avokatie apo noterie që ofrojnë shërbime të tilla. Gajda shtoi se këto shërbime mund të ofrohen falas shumë thjesht nëpër institucionet përkatëse ku kërkohet shërbimi.
“Nuk duhet të ketë një hapësirë kohore për krijimin e zyrave shtetërore që ofrojnë këto shërbime,” tha Gajda për BIRN.
“Mjafton që zyrat e institucioneve publike të afishojnë emrin dhe numrin e telefonit të personit që mund të asistojë qytetarët për shërbimet digjitale të kërkuara,” përfundoi ai.
