Katër zyrtarë të Bashkisë Fier dhe të Administratës Tatimore Rajonale janë vendosur nën masa sigurie nga autoritetet gjyqësore, pas dyshimeve për përfshirje në abuzime me të ardhurat publike dhe favorizim të bizneseve lokale.
Adela Hysenaj, 34 vjeçe, ish-drejtore e Taksave dhe Urbanistikës si dhe ish-nënkryetare e Bashkisë Fier, u vendos në “arrest shtëpie” nën akuzat për shpërdorim detyre dhe ushtrim të ndikimit të paligjshëm ndaj funksionarëve publikë. Me të njëjtën masë sigurie u përball edhe Vasil Ceku., 41 vjeç, drejtor i verifikimeve në terren pranë Drejtorisë Rajonale Tatimore, i cili u pezullua gjithashtu nga funksioni për shkak të dyshimeve për shpërdorim detyre.
Në listën e të pezulluarve për abuzime të ngjashme është edhe Anisa Cjapi., 38 vjeçe, aktualisht drejtoreshë e Taksave dhe Tarifave Vendore në Bashkinë Fier. Ndërkohë, Martin Dodi., 57 vjeç, sekretar i Përgjithshëm i Bashkisë, u pezullua nga detyra dhe iu ndalua dalja jashtë shtetit, teksa përballet me akuza për ushtrim të ndikimit të paligjshëm.
Hetimet lidhen me mosfiskalizimin e parkimit nëntokësor të administruar nga bashkia, që dyshohet t’i ketë shkaktuar një dëm prej rreth 40 milionë lekësh buxhetit vendor, si dhe me dhënien e lehtësirave të paligjshme për biznese të ndryshme në Fier.
