Pasuritë e shumta të ish-ambasadorit të Republikës së Shqipërisë në Doha të Katarit, Edmond Çaça dhe të bashkëshortes së tij, janë gjetur të pajustifikuara me burime të ligjshme nga një hetim i kryer prej Prokurorisë së Tiranës dhe janë sekuestruar. Sipas njoftimit të prokurorisë, në vitin 2019 ka filluar hetimi ndaj Çaças, bazuar në një referim të kryer nga Inspektorati i Lartë i Kontrollit dhe Deklarimit të Pasurive, ILDKPI për veprën penale ‘Refuzimi për deklarimin, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publik ose i çdo personi tjetër që ka detyrimin ligjor për deklarim“ si dhe “Pastrimi i produkteve të veprës penale ose veprimtarisë kriminale”.
Çaça ka qenë subjekt deklarues gjatë periudhës 2014 – 2017, kur dhe ka ushtruar funksionin si ambasador në Katar.
Bazuar në procedimin e nisur për fshehje pasurie dhe pastrim parash, prokuroria ka regjistruar në vitin 2025 dhe hetimin pasuror ndaj ish-ambasadorit Çaça, bazuar në ligjin “Për parandalimin dhe goditjen e krimit të organizuar dhe trafikimit nëpërmjet masave parandaluese kundër pasurisë”, të ndryshuar, i quajtur ndryshe dhe ligji “Antimafia”.
Pas hetimit pasuror të kryer, si dhe bazuar në analizën financiare të realizuar nga audituesi ligjor, është arritur në konkluzionin se ish-ambasadori Çaça dhe bashkëshortja e tij, nuk justifikojnë me burime të ligjshme të ardhurash disa pasuri të paluajtshme dhe të luajtshme, në vlerë të konsiderueshme.
Bazuar në këto rezultate të hetimit, Prokuroria e Tiranës ka kërkuar në gjykatë sekuestrimin e një trualli me sipërfaqe 8250 m2; tre parcela pyll me sipërfaqe totale 10 mijë e 800 m2; dy apartamente me sipërfaqe totale rreth 117 m2; si dhe të një llogarie bankare me gjendje 90 mijë euro. Gjykata ka pranuar kërkesën e organit të akuzës, duke vendosur sekuestro mbi këto pasuri.
