Këshilli i Lartë i Prokurorisë miratoi me shumicë votash të enjten propozimin e anëtarit Sokol Stojani për mënyrën e përzgjedhjes së mentorëve që do të drejtojnë praktikën e magjistratëve të rinj në Shkollën e Magjistraturës, duke rrëzuar një variant të mëparshëm të miratuar me shumicë në Komisionin e Zhvillimit të Karrierës.
Sipas variantit të propozuar nga relatorja Ledina Riza, prokurorët duhej të kishin kryer më parë trajnimin për mentorim, ndërkohë që Stojani këmbënguli se duheshin përfshirë dhe prokurorët e vjetër që kanë nga 30 apo 40 vjet eksperiencë, të cilët sipas tij janë më të dobishëm dhe mund t’u japin më shumë dije dhe ndihmë magjistratëve të rinj gjatë praktikës.
Në votim në Këshill u hodh dhe propozimi i Stojanit, sipas të cilit mentorimi mund të bëhet dhe nga prokurorët me më shumë eksperiencë, pavarësisht se nuk kanë kryer trajnimin. Anëtarja Arta Mandro propozoi që në shtator të mundësohet trajnimi i prokurorëve me eksperiencë që marrin përsipër të kryejnë mentorimin.
Pasi u hodh në votim, propozimi i Rizës mori votën e saj, të kryetares Bogdani, Mandros dhe anëtarit Erjon Fejzulla, duke mbetur në pakicë. Ndërsa propozimi i Stojanit që parashikon edhe përfshirjen e prokurorëve me eksperiencë të gjatë në punë, por të patrajnuar, u miratua pasi u votua nga pesë prej anëtarëve të pranishëm.
Në vijim, u konstatua se në listën e propozuar nga Stojani gjenden edhe emrat e 56 prokurorëve me përvojë. Relatorja Riza tha se nuk ishte në dijeni të listës. Po ashtu, anëtari Erion Fejzulla tha se dinte se votimi ishte kryer për kategorinë e prokurorëve që do të jenë mentor dhe jo për listën. “Vetëm nëse kam qenë unë në gjumë. Nëse këtu kalojnë me hile vendimet është histori tjetër”, tha ai.
Stojani tha se nuk mund të gjykohej një vendim i Këshillit. Ai vërejti vlerësimet e mëparshme të kryera nga mentorët e trajnuar janë gjithmonë shkëlqyeshëm, ç’ka sipas tij nuk janë objektive.
Debatet mes anëtarëve të KLP-së vijuan edhe më vonë. Stojani e akuzoi Rizën se megjithëse ishte e patrajnuar, gjendej në listën e ekspertëve të Shkollës së Magjistraturës.
Riza u shpreh se nuk e dinte të ishte pjesë e ndonjë liste ekspertësh, por sqaroi se kishte dhënë pëlqimin për të kontribuar pranë Shkollës së Magjistraturës për gjithçka që do vlerësohej si e nevojshme. Ajo theksoi se propozimi i saj ka qenë në funksion të ligjit dhe të magjistratëve të rinj, si dhe të garantimit të barazisë.
