Me vendimin e marrë këtë të hënë, Ana Dajko do të jetë deputetja më e re e Kuvendit të Shqipërisë, duke zgjidhur kështu ngërçin e krijuar.
Gjatë seancës, përfaqësuesit e koalicionit të drejtuar nga Adriatik Lapaj parashtruan kërkesën për lënien në fuqi të vendimit të kryekomisionerit Ilirjan Celibashi, që i jepte mandatin Kleana Xhuvelit, e renditur e katërta në listën e mbyllur në Tiranë dhe shfuqizimin e vendimit të Komisionit të Ankesave dhe Sanksioneve që mandatin ia jepte Ana Dajkos.
“Vendimi i KAS ishte tendencioz dhe politik. KAS thotë se Kodi Zgjedhor mbron kandidatët nga dorëheqja, por nga ana tjetër i detyron që të qëndrojnë përtej dëshirës së tyre. Deri në momentin që mandati nuk është dhënë, kandidati mund të heqë dorë nga mandati. Vendimi i KAS për t’i dhënë mandatin e deputetit Ana Dajkos është i gabuar”, pohoi Dorina Prethi, duke iu referuar vendimit të marrë nga trupa 5 anëtarëshe në KQZ, që mandatin ia kaloi Ana Dajkos dhe nuk pranoi dorëheqjet e kandidatëve në listën e mbyllur.
Gjatë seancës, ajo shtoi se, “vendimi i KAS, ka keqinterpretuar ligjin për kuotën gjinore. Arsyetimi KAS është diskriminues dhe antikushtetues, sepse nuk ka nënpërfaqësim, pasi është vetëm një kandidat fitues”.
Por përfaqësuesja e Komisionit Qendror të Zgjedhjeve, Pavlina Doçi, ishte kundër pohimeve se kandidatët mund të dorëhiqen në çdo moment, duke i drejtuar një pyetje Prethit: Deri kur mund të dorëhiqet një kandidat?
“Kandidati mund të tërhiqet nga kandidimi deri sa të jenë publikuar tabelat nga KQZ”, pohoi përfaqësuesja e “Nisma Shqipëria Bëhet”, e cila mbrojti vendimin e tërheqjes së kandidatëve të listës së mbyllur.
Trupa e Kolegjit Zgjedhor, pasi dëgjoi pretendimet e palëve, vendosi të lërë në fuqi vendimin e Komisionit të Ankesave dhe Sanksioneve dhe i dha fund ngërçit disa-mujor. Tashmë në Kuvend do të shkojë Ana Dajko, e para e listës së mbyllur në Tiranë.
Drejtuesi i koalicionit, Adriatik Lapaj, i renditur i pari në listë të hapur, duhet të bindë 12 kandidatët në listën e mbyllur për t’u dorëhequr nga mandati që të arrijë të hyjë në Kuvend.
