Policia e Shtetit njoftoi të enjten më 28 gusht procedimin penal të tre punonjësve të Inspektoriatit të Mbrojtjes së Territorit të Tiranës, të cilët akuzohen për korrupsion dhe shpërdorim detyre, pasi kërkonin ryshfet gjatë ushtrimit të kontrolleve për lirimin e hapësirave publike. Aksioni për lirimin e hapësirave publike nisi në fillim të korrikut me iniciativë të kryeministrit Edi Rama.
Pronari i një subjekti në zonën e Kombinatit në kryeqytet ka denoncuar pranë autoriteteve ligjzbatuese se i është ushtruar presion nga punonjës të IMT Tiranë se do t’i hiqnin tendën, nëse nuk paguante si ryshfet një shumë prej 100 mijë lekësh.
Sipas policisë, është arrestuar në flagrancë punonjësi i IMT-së në Bashkinë Tiranë, 33-vjeçari Geraldo Fuçia, ndërkohë që është shpallur në kërkim kolegu i tij, K.Zh. 35 vjeç. Po ashtu, është proceduar në gjendje të lirë dhe një punonjës tjetër i IMT-së, E. Ç. 48 vjeç, si dhe menaxheri i një lokali.
Policia bën me dije se punonjësit e IMT-së Tiranë janë proceduar për veprat penale “Korrupsioni aktiv i personave që ushtrojnë funskione publike“ dhe “Shpërdorimi i detyrës“, të kryera në bashkëpunim.
“Nga hetimet e kryera dyshohet se këta shtetas, gjatë kontrolleve në subjekte (lokale), për evidentimin dhe lirimin e hapësirave publike të zëna në kundërshtim me ligjin, iu kanë kërkuar para pronarëve të subjekteve, që të mos i hiqnin çadrat/tendat që zinin hapësirat publike përreth subjekteve,” thuhet në njoftim.
Punonjësit e IMT-ve të bashkive, që janë përgjegjësit kryesorë për parandalimin e zaptimit të hapësirave publike kanë filluar prej atëherë një aksion për heqjen e tendave nga troturaret, që megjithatë mbeten të zëna ashtu si më parë, prej tavolinave të subjekteve private.
Aksioni i kryeministrit Edi Rama për çlirimin e hapësirave publike është një shfaqje e përsëritur pothuajse pas çdo pale zgjedhjesh në Shqipëri. Sipas kritikëve, kjo dëshmon mbi “dështimin spektakolar” të sistemit të ndërtuar në 12 vjet qeverisje.
