Prokuroria e Tiranës njoftoi të mërkurën se ka vendosur sekuestro preventive mbi 18 pasuri të paluajtshme, dy automjete luksoze dhe disa llogari bankare të Kristjan Konit dhe nënës së tij pensioniste. Koni është i akuzuar në Itali për përfshirje në një rrjet të trafikut të narkotikëve gjatë viteve 2007–2012.
“Prokuroria pranë Gjykatës së Shkallës së Parë të Juridiksionit të Përgjithshëm, Tiranë, sekuestroi pasuritë e shtetasit K.K. dhe personave të lidhur me të, që dyshohet të jenë përfituar në mënyrë të paligjshme nëpërmjet veprimtarisë kriminale”, thuhet në njoftim.
Hetimet kanë zbuluar përdorimin e disa identiteteve të ndryshme nga Koni, si dhe transaksione financiare të pajustifikuara.
“Ky shtetas dhe nëna e tij në pension kanë veprimtari me origjinë kriminale që lidhet me shtetasin K.K. dhe historikun e tij të mëparshëm kriminal. Ai rezulton i përfshirë në një rrjet të strukturuar kriminal të trafikut të narkotikëve në Itali gjatë periudhës 2007–2012”, njoftoi prokuroria.
Pasuritë e sekuestruara ndodhen në Tiranë, Bathore, Farkë dhe Marikaj, ndërsa përfshijnë edhe pasuri në emër të subjektit juridik “Kriol.AL” sh.p.k. Sipas faqes zyrtare, kompania merret me import-eksport të frutave, perimeve dhe kafesë.
Prokuroria thekson se masat kanë për qëllim parandalimin e përdorimit të pasurive për veprimtari kriminale dhe garantimin e konfiskimit të tyre në rast vendimesh gjyqësore.
