“Nga vëzhgimet tona dhe nga denoncimet e shumta të bëra publike, konstatohet se aktiviteti i saj mbart tiparet e qarta të një skeme mashtruese digjitale,” shkruhet në njoftimin publik të Autoritet Kombëtar për Sigurinë Kibernetike.
Platforma TXEX prezantuar si aplikacion për investime në kriptovaluta nuk figuron e regjistruar dhe as e licensuar në Shqipëri, duke e bërë aktivitetin e saj të jashtëligjshëm.
AKSK paralajmëroi qytetarët se plaforma i josh investuesit nëpërmjet reklamave të rreme në rrjetet sociale, si edhe në aplikacione komunikimi të tilla si WhatsApp, Telegram, apo Signal.
Më herët, kjo platformë u denoncua edhe nga deputeti i Partisë Socialiste, Erion Braçe, i cili e cilësoi platformën si një “skemë piramidale” online, prej të cilës ishin mashtruar me mijëra njerëz në Shqipëri.
“Piramidat e reja tani janë online, në çdo telefon. Për kë është jashtë skeme e joshet të hyjë, mos hyr aty, do të grabisin,” tha Braçe përmes një postimi në faqen e tij në Facebook.
Autoriteti Kombëtar për Sigurinë Kibernetike gjithashtu u bëri thirrje shqiptarëve për rreziqet reale që u kanosen nëse ato investojnë në këtë platformë.
“Përfshirja në këtë platformë sjell humbje financiare të parikuperueshme, rrezik të lartë për cënimin e privatësisë dhe identitetit digjital, si edhe mundësi të përdorimit të të dhënave personale nga rrjete kriminale”, shkruan AKSK.
