Policia e Elbasanit deklaroi të hënën se kishte goditur një grup shpërndarësish të lëndëve narkotike në këtë qark pas hetimeve 1-vjeçare, duke ndaluar 30 persona dhe shpallur në kërkim nëntë të tjerë.
Sipas njoftimit, shpërndarësit e ushtronin veprimtarinë e paligjshme në qytetet e Elbasanit, Peqinit, Librazhdit, Përrenjasit, Cërrikut dhe Gramshit, duke shitur kryesisht kanabis dhe kokainë.
Sipas burimeve të prokurorisë, nga vëzhgimet, përgjimet dhe blerjet e simuluara është arritur të sigurohen prova të mjaftueshme ndaj 39 shpërndarësve të drogërave të ndryshme. Pesë arreste janë kryer në kushtet e flagrancës, 25 të tjerë janë ndaluar bazuar në masat e caktuara nga gjykata, ndërsa 9 janë shpallur në kërkim dhe po punohet për kapjen e tyre. Po ashtu, gjatë kontrolleve të ushtruara janë gjetur dhe disa armë e municione luftarake që mbaheshin pa leje.
Nga hetimi është arritur të identifikohen vetëm shitësit fundorë të lëndëve narkotike, që janë kapur me disa doza. Ndërsa për furnizuesit e tyre nuk është arritur të sigurohen prova, pasi sipas prokurorisë, ata nuk rezulton t’u shesin lëndë narkotike personave të panjohur. Burimet e organit të akuzës bëjnë me dije se droga kalon në disa duar derisa mbërrin tek përdoruesit, përmes shitësve fundorë. Nga hetimet, ka rezultuar se të proceduarit e shisnin drogën në zona të caktuara të lagjeve të qyteteve, pranë shkollave, në lokale apo dhe ambjente të tjera.
