Prokuroria e Beratit njoftoi të mërkurën më 10 shtator fillimin e hetimeve ndaj pronarit të kompanisë Era-Fruit, Mariglen Qorri, si dhe ndaj dy inspektorëve të Autoritetit Kombëtar të Ushqimit, AKU, dega Berat, Ronaldo Lika dhe Griselda Doksani, pas bllokimit dhe asgjësimit të ngarkesës me 8 ton domate në Kroaci që dyshohet se përmbanin tej normave të lejuara preparatin Chlorfenapyr, një lloj pesticidi toksik.
Në njoftim thuhet se prokuroria kërkoi ndalimin e Qorrit për veprat penale “Importimi, prodhimi, shitja dhe ruajtja e ushqimeve të rrezikshme për shëndetin ose jetën e njerëzve”, “Mashtrimi me produktet ushqimore” dhe “Falsifikimi i dokumenteve”. Për dy inspektorët e sigurisë ushqimore është kërkuar ndalimi për veprën penale “Shpërdorim detyre”.
Nga hetimet ka rezultuar se autoritetet kroate kanë konstatuar dhe më pas asgjesuar një sasi prej rreth 8 tonë domate e eksportuar atje nga subjekti Era-Fruit, pasi nga analizat ka rezultuar se niveli i perparatit “Chlorfenapyr” ishte 0.06 miligram për kilogram, nga 0.01 miligram për kilogram që duhet të jetë.
Po ashtu, është konstatuar se biznesmeni Qorri ka prerë një faturë blerje fiktive nga një fermer dhe e ka përdorur për praktikat doganore dhe raportin e gjurmueshmërisë të mbajtur nga AKU Berat, duke u munduar të shmangë përgjegjësinë e tij ligjore për produktin që ka prodhuar dhe tregtuar.
“Nga veprimet hetimore rezultoi se kjo sasi domate e rrezikshme për shëndetin e njerëzve është prodhuar dhe më pas eksportuar nga vetë shtetasi M.Q”, citohet në njoftim.
Dy inspektorët e AKU-së Berat, ka rezultuar se, pas njoftimit nga sistemi Rasff, kryen inspektim më datë 29 gusht në subjektin Era Fruit dhe nuk konstatuan sasinë e domateve të ndodhur në magazinën e subjektit, duke plotësuar praktikën sikur aty nuk gjendej asnjë sasi domateje. Për rrjedhojë ata nuk kanë kryer bllokimin e sasisë së domateve që gjendej aty dhe marrjen e mostrave për kryerjen e analizave për këtë produkt.
“Këta inspektorë, kanë marrë të mirëqenë si të rregullt faturën fiktive të prerë nga shtetasi M.Q., të pa firmosur nga fermeri/shitësi duke mbajtur mbi bazën e tij raportin e gjurmshmërisë së produktit dhe duke tjetërsuar faktet në lidhje me origjinën e produktit të konstatuar me probleme”, vlerëson prokuroria dhe shton se janë marrë mostra të prodhimeve të tjera bujqësore të gjetura pranë subjektit Era Fruit, të cilat do t’u nënshtrohen analizave, pasi dyshohen se janë të kontaminuara.
