Këshilli i Emërimeve në Drejtësi, KED publikoi të enjten pikëzimin e shtatë kandidatëve për vendin vakant të Holta Zaçajt në Gjykatën Kushtetuese, duke renditur në krye të listës gjyqtarin e Gjykatës së Lartë, Asim Vokshi me 89.5 pikë.
Në vendin e dytë me një diferencë të papërfillshme, KED ka renditur ish-kryetaren e Këshillit të Lartë Gjyqësor, Naureda Llagami me 89.3 pikë, i ndjekur nga ish-komisioneri publik, Florian Ballhysa me 77.83 pikë.
Alma Faskaj ka siguruar 77.77 pikë, Genta Tafa (Bungo) me 75.44 pikë dhe ish-anëtari i KLGJ, Alban Toro me 74.22 pikë.
KED në vijim do të miratojë raportin e arsyetuar për procedurën e verifikimit, të vlerësimit dhe pikëzimit të secilit kandidat dhe të renditjes përfundimtare të tyre, me qëllim dërgimin e tij më pas te organi i emërtesës, Gjykata e Lartë. Tre të parët sipas rendites së pikëzimit, gjyqtari Asim Vokshi, ish-kryetarja e KLGj-së, Naureda Llagami dhe ish-Komisioneri Publik, Florian Ballhya mbeten në garë për vendin e Zaçajt. Ata do të votohen në mbledhjen e përgjithshme e gjyqtarëve të Gjykatës së Lartë dhe fituesi do të emërohet në pozicionin vakant në Gjykatën Kushtetuese. Votimi i anëtarëve të Gjykatës së Lartë është i fshehtë.
Gjykata e Lartë bëri publike më 13 janar listën e kandidatëve që paraqitën interes për vakancën e krijuar në Gjykatën Kushtetuese si rezultat i mbarimit të mandatit të kryetares së kësaj gjykate, Holta Zaçaj. Nga 13 kandidatët që aplikuan, shtatë prej tyre plotësuan kriteret ligjore për vijimin e garës.
Në muajin dhjetor të vitit të kaluar, kryetari i Gjykatë së Lartë, Sokol Sadushi bëri shpalljen publike për hapjen e procedurës së aplikimit për zgjedhjen me mandat të plotë nga Gjykata e Lartë të anëtarit të Gjykatës Kushtetuese, për vendin e Holta Zaçajt. Shpallja për hapjen e procedurës shkaktoi polemika mes Zaçajt dhe kryetarit të Gjykatës së Lartë, Sokol Sadushi. Ky i fundit këmbënguli se mandati i Zaçajt përfundonte në pranverë të vitit 2025 dhe hapi procedurat për përzgjedhjen e pasardhësit të saj duke shpallur vendin vakant. Nga ana tjetër, kryetarja e Gjykatës Kushtetuese pretendoi se mandati përfundonte në fund të vitit 2025 dhe e akuzoi Gjykatën e Lartë për cënimin e sigurisë juridike të mandateve të gjyqtarëve të Gjykatës Kushtetuese. Megjithëse Gjykata Kushtetuese e gjeti me shkelje njoftimin e kryer nga Gjykata e Lartë, e la në fuqi shpalljen e vakancës. Shumica e anëtarëve të Gjykatës Kushtetuese vendosën mbarimin e mandatit të Zaçajt më 10 mars 2025.
