Prokuroria pranë Gjykatës së Shkallës së Parë të Juridiksionit të Përgjithshëm në Tiranë kërkoi dënimin e shtetasit Nigerian i cili para disa muajsh u denoncua nga një biznesmen shqiptar për mashtrim kompjuterik dhe financiar nëpërmjet një emaili të rremë.
Nigeriani përdori adresën e emalit të një firme furnitore italine, duke ndryshuar një prej shkronjave të adresës elektronike, dhe nëpërmjet saj duke i kërkuar biznesmenit shqiptar t’i dërgonte një pagesë prej 25 mijë Eurosh.
“Gjate hetimit dhe gjykimit u zbulua dhe mekanizmi i kryerjes së këtij mashtrimi kompjuterik, i cili ka arritur të mashtrojë disa biznese në Shqipëri”, shkruan njoftimi i Prokurorisë.
Hetimet e Prokurorisë së Tiranës nxorën në pah se emailet dhe faqet e kompanive që ishin shënjestruar kishin fjalëkalime tepër të thjeshta, ose kishin një nivel të ulët mbrojtje kompjuterike.
“Adresat hakeroheshin nga hakera ndërkombëtarë të cilët gjurmojnë këto faqe dhe bisedat që kanë lidhje me pagesa faturash dhe transferta monetare me destinacion nga brenda për jashtë territorit të Republikës së Shqipërisë”, shkruan njoftimi i Prokurorisë.
Këto hakera më tej komunikonin me bizneset e shënjestruara duke u paraqitur si subjektet furnizuese dhe duke hapur adresa elektronike tepër të ngjashme, në mënyrë që të mos pikaseshin. Me këto adresa, ato u kërkonin pagesa kompanive të shënjestruara.
Prokuroria e Tiranës u bëri thirrje bizneseve të mos bien pre e mashtrimeve të tilla dhe të marrin masa për të forcuar mbrojtjen e sistemeve të tyre kompjuterike.
