Më 29 shtator nisi në Tiranë Maratona e Filmave Queer, një festival tashmë i kthyer në traditë dhe që po organizohet për herë të gjashtë në Shqipëri, duke sjellë një maratonë filmash që trajtojnë çështje sensitive dhe problematika të komunitetit LGBTQI.
Kumbara e edicionit të gjashtë, Elsa Lila u shpreh në një konferencë për shtyp se nëpërmjet këtij festivali synohet të jepen mesazhe të forta solidariteti, paqeje dhe mirëkuptimi.
“Filmat përgjatë dy javëve do të sjellin tematika sensitive lidhur me LGBTQI, plot emocione dhe tema ende problematike për shoqërinë tonë,” tha Lila.
Maratona e filmave Queer zhvillohet që prej vitit 2019 në Tiranë, duke trajtuar disa prej problematikave kryesore të komunitetit LGBTI, si bullizmi, gjuha e urrejtjes dhe kryesisht histori të vërteta nga komuniteti.
Arbër Kodra, organizator i Festivalit dhe drejtor ekzekutiv i organizatës OMSA, u shpreh se ky festival vijon të thyejë tabu.
“Ky festival do vazhdojë të sfidojë normat shoqërore dhe të promovojë empatinë nëpërmjet aktivizmit,” tha Arbër Kodra në konferencën për shtyp që shënoi hapjen e festivalit.
“Nëpërmjet kombinimit të artit dhe aktivizmit, ne sfidojmë tabutë dhe promovojmë të drejtat e njeriut dhe personave LGBTQI”, vijoi ai.
Edhe aktivistja dhe ambasadorja e festivalit, Zhaklin Lekatari u shpreh se tematikat që trajton festivali janë gjithëpërfshirëse.
“Historitë Queer dhe LGBTQI nuk janë histori të veçuara, por na përkasin të gjithëve, pasi këta persona janë pjesë e familjeve dhe synojnë gjithashtu të krijojnë familje”, tha Lekatari.
Festivali do të zhvillohet nga 29 shtatori deri më 15 tetor në Vila 31 dhe qendra e artit Agimi.
