Prokuroria e Posaçme Kundër Korrupsionit dhe Krimit të Organizuar, SPAK ka përfunduar hetimet ndaj ish-kryetares së komanduar të Bashkisë së Tropojës, Zyra Ismalaj, e cila akuzohet për veprën penale “korrupsioni pasiv”, si dhe çështja në ngarkim të saj dhe një biznesmeni është dërguar në gjykatë për kalimin për gjykim. Biznesmeni i hetuar për këtë çështje akuzohet për “korrupsion aktiv”.
Zyra Ismalaj u komandua si kryetare e Bashkisë Tropojë një vit më parë, pas procedimit dhe arrestimit të kryetarit Rexhë Byberi për shpërdorim detyre. SPAK e akuzon Byberin se ka kryer veprime dhe mosveprime në mospërmbushje të rregullt të detyrës, gjatë procesit për hapjen e rrugëve, sipas projekteve të miratuara nga Këshilli Bashkiak. Prokuroria vlerëson se hapja e rrugëve sipas projekteve të miratuara nga Këshilli Bashkiak është bërë në kundërshtim me aktet ligjore e nënligjore në fuqi duke sjellë një dëm prej 277 milionë lekësh. Në muajin gusht, gjykata pranoi të zëvendësojë masën e sigurimit të Byberit, duke e lënë atë në arrest shtëpiak.
