James ‘Jock’ Covey, dëshmitari i katërt për mbrojtjen e ish-presidentit të Kosovës Hashim Thaçi në gjyqin e tij për krime lufte dhe krime kundër njerëzimit në Hagë, i tha gjykatës këtë javë se Thaçi nuk ishte luftëtar, por një politikan që kishte kritikuar dhunën me bazë etnike në Kosovën e pasluftës.
Covey ishte zëvendës i përfaqësuesit të OKB-së në Kosovë, Bernard Kouchner, nga 15 korriku 1999 deri në janar 2001, menjëherë pas përfundimit të luftës. Të mërkurën, Covey i tha gjykatës se “gjykimi ynë ishte mjaft i qartë se ky person që qëndronte pranë nesh (Thaçi) nuk ishte luftëtar dhe nuk besoj se ka ndonjë provë që ky njeri të ketë qëlluar ndonjëherë një plumb si rezultat i mërzisë ose zemërimit”.
Gjatë marrjes në pyetje të enjten, ai tha se Thaçi “ishte tepër i kujdesshëm kur bëhej fjalë për ndonjë marrëdhënie me udhëheqësit e lëvizjes së UÇK-së (Ushtrisë Çlirimtare të Kosovës)”.
Covey shtoi se ky gjykim bazohej në “sjelljen e Thaçit, sepse dinjiteti i tij nuk do të lejonte askënd të thoshte këtë (se ata kishin frikë); ne ndienim se mund ta shihnim, ta nuhasnim”.
Të martën, Covey i tha gjykatës se komandantët e UÇK-së në zonat e ndryshme të betejës në të gjithë vendin nuk e respektonin Thaçin, dhe misioni i përkohshëm i OKB-së në Kosovë, UNMIK, “nuk e trajtonin atë si komandant”.
Ish-zyrtari i OKB-së kujtoi se Thaçi vazhdimisht bënte thirrje për t’i dhënë fund dhunës midis komuniteteve etnike, pa lidhje me mbërritjen e forcave ndërkombëtare pasi trupat serbe u tërhoqën nga Kosova kur lufta mbaroi.
Covey i tha gjykatës se asnjë nga krimet e dyshuara të kryera nga luftëtarët e UÇK-së kundër atyre që ata i shihnin si bashkëpunëtorë me Serbinë “nuk lidhen drejtpërdrejt me z. Thaçi”. Ai tha gjithashtu se Thaçi nuk i përdori krimet e kryera individualisht ose nga anëtarë të tjerë të UÇK-së për përfitimin e tij politik.
“Ne shpejt arritëm në përfundimin se ai nuk kishte autoritetin personal për ta bërë dikë tjetër ta bënte këtë (të kryente krime të tilla). Për më tepër, unë dhe ne arritëm në përfundimin se ai e dinte se nuk e kishte atë autoritet dhe atë pushtet”, tha dëshmitari.
Ashtu si disa dëshmitarë të tjerë që kanë dëshmuar para gjykatës, Covey tha gjithashtu se UÇK-ja nuk kishte një strukturë të centralizuar ushtarake. Mbrojtja po kërkon të provojë se Thaçi dhe të bashkëpandehurit e tjerë me të, si figura të larta të UÇK-së, nuk mund të kishin urdhëruar luftëtarët të kryenin krime pasi forca guerile nuk funksiononte me një hierarki nga lart poshtë.
Thaçi u padit në tetor 2020 dhe dha dorëheqjen si president i Kosovës në nëntor 2020 për t’u përballur me akuzat dhe u dërgua në Hagë me ish-kryetarët e parlamentit Jakup Krasniqi dhe Kadri Veseli, dhe ish-deputetin Rexhep Selimi. Ata kanë qenë në paraburgim që atëherë.
Të katër akuzohen për përgjegjësi individuale dhe komanduese për krime lufte dhe krime kundër njerëzimit gjatë luftës së Kosovës, përfshirë vrasjen e rreth 100 personave. Të gjithë janë vetëdeklaruar të pafajshëm.
Dhomat e Specializuara të Kosovës janë pjesë e sistemit të drejtësisë së Kosovës, por janë të vendosura në Hagë me një staf ndërkombëtar për të siguruar procedura të drejta pas problemeve të kanosjes së dëshmitarëve në rastet e mëparshme të lidhura me UÇK-në. Shumë shqiptarë etnikë dhe mbështetës të UÇK-së këmbëngulin se procedurat kanë qenë të padrejta ndaj të pandehurve.
Shumë dëshmitarë të prokurorisë kanë dëshmuar me dyer të mbyllura për të mbrojtur identitetin e tyre për shkak të frikës nga hakmarrja, por kjo ka çuar në akuza për mungesë transparence.
