Komisioneri Shtetëror i Zgjedhjeve, Ilirjan Celibashi mbrojti punën e institucionit që ai drejton në raport me problematikat e konstatuara në zgjedhjet parlamentare të 11 majit, ndërsa raportoi para Komisionit të Ligjeve të martën.
Ai u përball me kërkesë llogarie nga deputetë të opozitës mbi gjetjet e Vëzhguesve Ndërkombëtare të misionit të OSBE-ODIHR, referuar kryesisht përdorimit të burimeve publike në fushatë nga ana e partisë në pushtet.
“Ka nisur të jetë rekomandim prioritar që nga vitit 2017, bëhet fjalë për abuzimin total me burime shtetërore nga qeveria Rama,” tha Oerd Bylykbashi, deputet i Partisë Demokratike dhe nënkryetar i këtij komisioni.
Bylykbashi tha se opozita ka denonuar atë që ai e quajti “inaktiviteti i KQZ-së për të parandaluar dhe ndëshkuar në mënyrë efikase këtë abuzim të qeverisjes me çdo kompetencë, që nga burime minimale deri tek ato rregullatore”.
Ai akuzoi më tej se ky institucion me vendimmarrjet e tij ka krijuar “autostradën e hapur për qeverinë për të shpartalluar zgjedhjet”, duke iu referuar shqyrtimit të vendimeve të qeverisë për bonuse për pensionistët para zgjedhjeve.
Celibashi u përgjigj duke iu referuar raportit paraprak të misionit vëzhgues të ODIHR që ka vlerësime pozitive për rolin e KQZ në këtë proces zgjedhor.
Ai tha se nuk shtonte asgjë në qëndrimet dhe vlerësimet e vëzhguesve për procesin, por theksoi se “aty ka vlerësime përsa i përket qasjes profesionale dhe të paanshme të KQZ-së”.
Celibashi tha se i ka ushtruar kompetencat e mundshme ligjore duke shqyrtuar ankimet dhe denoncimet dhe në lidhje me sjelljen e funksionarëve publikë dhe atë të qeverisë.
“Këto vendime kanë ndjekur rrugën e tyre ligjore dhe nga KAS dhe Kolegji Zgjedhor dhe në fund të fundit duhet të pranojmë atë verdikt që sot kemi,” sugjeroi ai.
Kreu i KQZ-së po ashtu e quajti të suksesshëm bashkëpunimin me Prokurorinë e Posaçme, SPAK, gjatë zgjedhjeve të fundit pavarësisht kritikave të Bylykbashit.
“Ndoshta nuk bëri atë që dikush e ka pritur, por me siguri impakti ka qenë pozitiv dhe natyrisht ka vend për ta përmirësuar…”- shtoi ai.
Celibashi cilësoi një sukses procesin e votimit nga jashtë që u realizua për herë të parë në këto zgjedhje, pavarësisht kritikave që ka pasur opozita dhe gjithashtu cilësoi me ‘integritet’ procesin e identifikimit elektronik të përdorur në ditën e votimeve.
Ndërkohë, deputetë të mazhorancës identifikuan si problematikë mungesën e qëndrueshmërisë së administratës zgjedhore dhe politizimin e saj, problem për të cilin ata nuk fajësuan KQZ-në, por rregullimin ligjor.
Deputeti i PS-së, Damian Gjiknuri, tha se rekomandimet e raporteve të OSBE-ODIHR nuk janë plotësuar për shkak se Kuvendi nuk ka marrë masa për t’i adresuar ligjërisht problematikat.
“Në momentin kur administrata zgjedhore është tërësisht e varur nga flusket politike s’kemi pse kritikojmë KQZ për një gjë nuk e ka në dorë,” tha ai, duke shtuar se në reformën e re zgjedhore do të shikohej “trupave profesioniste për administrimin e zgjedhjeve”.
Raportimi në Kuvend lidhej me punën e këtij institucioni për vitin 2024, një proces i cili këtë vit është i vonuar nga Kuvendi.
