Kërkesa vjen pas disa dekreteve të firmosura nga Begaj që janë kontestuar nga opozita, siç janë dekretimi i një kompetence të re për kryeministrin Rama në lidhje me krijimin e një ministrie virtuale si dhe caktimin e datës së zgjedhjeve për bashkinë Tiranë.
Presidenti i dekretoi zgjedhjet në Tiranë pa marrë parasysh një ankim të regjistruar në Gjykatën Kushtetuese kundër shkarkimit të Erion Veliajt nga Këshilli i Ministrave.
Në sqarimin e tij publik, presidenti Begaj pretendoi se Veliaj nuk ishte shkarkuar mbi bazën e nenit 115 të Kushtetutës ndaj do të duhej t’i ishte drejtuar me ankim Gjykatës Administrative dhe jo Gjykatës Kushtetues, por mbrojtësit e Veliajt pretendojnë që kjo anashkalon pikën 2 të nenit 115 të Kushtetutës, i cili e pezullon shkarkimin e një të zgjedhuri pas ankimit në gjykatë.
Sipas Kushtetutës dhe ligjit për “Vetëqeverisjen Vendore”, një kryetar bashkie i zgjedhur mund të shkarkohet nga Këshilli i Ministrave për shkelje të rënda të Kushtetutës dhe ligjeve, kur dënohet me vendim të formës së prerë ose kur nuk paraqitet në detyrë për një periudhë 3-mujore.
Partia Demokratike e akuzoi presidentin Begaj se kishte bërë shkelje të rëndë të Kushtetutës dhe se kishte rrënuar autoritetin e Gjykatës Kushtetuese.
Grupi i PD-së proteston ndaj refuzimit të mazhorancës socialiste për të përdorur mekanizmat e kontrollit parlamentar nga opozita, si mocionet për debat dhe interpelancat.
Bashkë me kërkesën për nisjen e procedurës kundër Presidentit, PD ka vendosur të kërkojë dhe ngritjen e dy komisioneve hetimore; për parregullësitë zgjedhore të 11 Majit dhe për lidhjet e e Kryeministrit Edi Rama me ish-agjentin e FBI-së, Charls McGonigal.
Po ashtu, partia më e madhe opozitare kushtëzon pjesëmarrjen e saj në dy komisionet e posaçme parlamentare, lidhur me Reformën Zgjedhore dhe Reformën Territoriale, të kërkuar nga mazhoranca socialiste.
“Pjesëmarrja e opozitës në këto komisione do të mundësohet vetëm nëse puna në to ndërtohet mbi bazën e garancive të barazisë pozitë-opozitë, të konsensusit në vendimmarrje në komision dhe në seancë plenare, të respektimit të parimit të transparencës dhe gjithëpërfshirjes, si dhe të angazhimit në proces sipas fushave që mbulojnë të ekspertëve të OSBE-ODIHR, Këshillit të Europës, të Komisionit të Venecias dhe të Kongresit të Autoriteteve Vendore dhe Rajonale të Këshillit të Evropës”- thuhet në njoftimin për shtyp të shpërndarë të mërkurën pas mbledhjes së grupit parlamentar.
