Gjykata e Posaçme deklaroi fajtore për akuzën e pastrimit të parave ish-drejtoreshën e Kadastrës së Durrësit, Rajmonda Dashi, por dënimi i saj prej 4 vjet e 8 muaj burg u pezullua dhe ajo u vendos në shërbim prove për një periudhë 3-vjeçare.
Dashi u mor në hetim nga Prokuroria e Posaçme, e dyshuar si pjesë e një grupi kriminal të përfshirë në pastrim parash të përfituara në Belgjikë përmes veprimtarive të paligjshme.
Të pandehur në këtë çështje ishin dy vëllezërit Besjan dhe Leonard Ramaj si dhe Ardjan Malasi, të cilët u shpallën gjithashtu fajtorë për veprën penale të pastrimit të parave. Por Gjykata e Posaçme rrëzoi akuzat e grupit të strukturuar kriminal ndaj tyre.
Në aplikim të gjykimit të shkurtuar, Besjan Ramaj u dënua përfundimisht me 6 vite e 8 muaj burgim, ndërsa i vëllai, Leonard Ramaj me 5 vjet heqje lirie. Ndërkohë, Ardjan Malasi u dënua me 6 vjet burg për të njëjtën akuzë.
SPAK njoftoi dy vjet më parë sekuestrimin dhjetëra pasurive të paluajtshme dhe likujditeteve bankare që dyshoheshin se ishin krijuar me të ardhura të përfituara nga ushtrimi aktiviteteve kriminale në Belgjikë nga tre të pandehurit dhe rrethi i tyre familjar.
Sipas prokurorisë, gjatë ushtrimit të këtij aktiviteti dy vëllezërit kanë pasur bashkëpunim të veçantë me personat nën hetim Ardjan Malasi dhe Rajmonda Dashi, të cilët kanë kryer veprime të kundërligjshme sistematike e të vazhdueshme me qëllim pastrimin e të ardhurave që janë përfituar nga kryerja e aktivitetit kriminal në Belgjikë, duke investuar në pasuri të paluajtshme në Shqipëri.
