Prokuroria e Elbasanit lëshoi një urdhër të menjëhershëm lirimi ndaj avokatit Ulian Bajrami të hënën, thuajse 48 orë pas ndalimit të tij të debatueshëm në sallën e gjyqit, që u pasua me reagime dhe protesta të avokatëve në të gjithë vendin.
Sipas Prokurorisë së Elbasanit, urdhri i lirimit ishte firmosur pasi u vlerësuan aktet e ndalimit me iniciativë nga ana e Policisë Gjyqësore, nga ku ka rezultuar se nuk ka elementë për të caktuar ndonjë masë sigurimi personal ndaj tij.
Gjithsesi, procedimi penal ndaj Bajramit me akuzat e kanosjes së prokurorit do të vazhdojë në gjendje të lirë. Një burim nga Prokuroria e Elbasanit i tha BIRN se çështja do të transferohet për kompetencë në një tjetër prokurori për të shmangur ndikime të mundshme.
Avokati Ulian Barjami u ndalua të shtunën pas një debati me prokurorin Gjergji Ceka gjatë një séance për masë sigurie të zhvilluar të premten e kaluar. Ndalimi u krye nga policia gjyqësore për veprën penale të kanosjes.
Ndalimi i avokatit Bajrami u dënua nga kolegët e tij, ndërkohë që Dhoma Kombëtare e Avokatisë vendosi bojkotimin e të gjitha seancave penale përgjatë datave 20-25 tetor, me përjashtim të seancave që kanë të bëjnë me masat e sigurimit personal.
Kryetari i Dhomës së Avokatisë Elbasan, Demir Çiftja i tha BIRN se avokati i ndaluar nuk ka kryer asnjë vepër penale. Çiftja tha se ka qenë dhe vetë në atë seancë gjyqësore dhe ka dëgjuar gjithçka, duke nënvizuar se avokati Barjami vetëm sa “ka zhvilluar debat gjyqësor në kuadër të barazisë së armëve”.
“Kallëzim mund të bëhej, por jo të arrestohej. Ishte prokurori që i tha atij në sallë se do të arrestohej. Jo çdo gjë që thotë prokurori duhet të bëhet,” pohoi Çiftja.
Përfaqësuesi ligjor i Barjamit, avokati Ardian Visha e cilësoi si skandaloz rastin.
“Quhet kanosje se tha avokati se do kryente kallëzim penal,” ironizoi Visha.
Këshilli i Lartë Gjyqësor, KLGj tha të hënën se ndjek me vëmendje çdo çështje që prek gjyqësorin. Ndërkohë, lidhur me pasojat që mund të sjellë bojkoti në proceset gjyqësore, KLGj bëri me dije se nuk kanë ndonjë qëndrim, por do të njoftojnë në vijim.
Inspektori i Lartë i Drejtësisë, ILD bëri me dije se ka nisur verifkkimin në vend që në mëngjes me iniciativë, bazuar në raportimet në media. Sipas ILD, deri tanimë nuk ka ndonjë ankesë, por ka mbërritur një letër nga Dhoma Kombëtare e Avokatisë, drejtuar disa institucioneve, përfshirë dhe ILD-së, ku njoftohet vendimarrja e kësaj dhome për rastin në fjalë.
