Drejtuesi i SPAK kërkon lënien në fuqi të vendimit për konfirmimin në detyrë të prokurorit të Tiranës, Elidon Hysenaj. Gjatë paraqitjes së konkluzioneve përfundimtare shtesë në çështjen e vetingut të prokurorit Hysenaj, prokurori Klodian Braho, i cili përfaqëson drejtuesin e SPAK, deklaroi të premten më 24 tetor, se mbeten ende të paqarta qëndrimet e subjektit në dakordësimin për kërkesat e palëve në proceset penale, për zëvendësimin e masave të tyre në tre çështje.
Në vijim, Braho sqaroi se drejtuesi i SPAK kishte konsultuar informacionet e klasifikuara të institucioneve ligjzbvatuese, si ato të gjendur në fashikujt e hetimit administrative në Kolegj, ashtu edhe në institucionet burimore. Në përfundim, vlerësohet se gjetjet e konstatuara nuk mund të justifikojnë penalizimin e subjektit të rivlerësimit e për rrjedhojë, u kërkua lënia në fuqi e konfirmimit në detyrë.
Prokurori Elidon Hysenaj dhe përfaqësuesja e tij ligjore, avokatja Romina Zano shprehën dakordësi me kërkimin e drejtuesit të SPAK, duke cilësuar të drejtë.
Kolegji u tërhoq për marrjen e vendimit që do të shpallet më datë 28 tetor, në orën 15:30.
Komisioni i Pavarur i Kualifikimit, KPK i verifikoi gjatë hetimit administrativ informacionet e klasifikuara lidhur me prokurorin Elidon Hysenaj dhe nuk gjeti probleme penalizuese, duke e konfirmuar këtë subjekt rivlerësimi më 9 tetor të vitit 2023. Kjo vendimmarrje u ankimua nga Komisioneri Publik, Florian Ballhysa, i cili kërkoi që të verifikohen të dhënat e klasifikuara e të trajtohen lidhur me dakordësimin e subjektit për kërkimet e të hetuarve për lehtësimin e masave të sigurimit ndaj tyre – të dhëna që u çmuan nga drejtuesi i SPAK, të pamjaftueshme për penalizim.
