Prokuroria e Posaçme kundër Korrupsionit dhe Krimit të Organizuar, SPAK njoftoi të martën më 28 tetor përfundimin e hetimeve ndaj gjashtë të pandehurve të akuzuar për ndikim të paligjshëm në sistemin e drejtësisë, si dhe për shpërdorim detyre pasi dyshohet se kanë shpërndarë të dhënat e TIMS tek persona të tretë.
Çështja ndaj ish-shefit të krimeve në komisariatin nr. 3, Erjon Dani dhe të pandehurve Musa Gjikola, Klodjan Muça, Sokol Masha, Emiljano (alias Millan) Roçi, dhe Vilson Roçi është dërguar në gjykatë. Të dhënat ndaj të akuzuarve janë siguruar gjatë një hetimi tjetër për trafik droge e të qenieve njerëzore.
Në njoftim bëhet me dije se nga hetimet e kryera ka rezultuar se gjatë vitit 2020, të pandehurit janë përfshirë në tre episode të veçanta, ku kanë kërkuar dhe përfituar shuma monetare që varionin nga 4 000 deri në 7 500 euro, me pretendimin se kishin aftësinë për të ushtruar ndikim të paligjshëm ndaj funksionarëve të drejtësisë, me qëllim ndikimin në masa sigurimi personal dhe favorizim në dhënie dënimi ndaj disa të arrestuarve.
Po ashtu, sipas SPAK është provuar se i pandehuri Erjon Dani, i cili në kohën e këtyre ngjarjeve ka mbajtur funksionin e zëvendësshefit të komisariatit dhe shefit për krimet në Komisariatin Nr. 3 Tiranë, ka shpërdoruar detyrën duke shpërndarë tek persona të tretë të dhëna të siguruara nga sistemi TIMS.
Nga hetimet ka rezultuar se të pandehurit kanë bashkëpunuar duke i koordinuar veprimet përmes komunikimeve në platformën e enkriptuar “Sky ECC.
Hetimi ndaj gjashtë të pandehurve është ndarë nga një procedim penal i vitit 2023, për të cilin vijojnë hetimet për veprat penale të “trafikimit të lëndëve narkotike”, “ndihmës për kalim të paligjshëm të kufirit” dhe “grupit të strukturuar kriminal”.
Erjon Dani dhe gjashtë persona të tjerë u arrestuan në korrik të këtij viti në kuadër të këtyre hetimeve, gjatë një operacioni të shtrirë në qarqet Tiranë, Elbasan, Shkodër dhe Vlorë, ndërkohë që u shpallën në kërkim dhe gjashtë të tjerë.
