Kolegji i Posaçëm i Apelimit, KPA u njoh të martën më 28 tetor me parashtrimet në çështjen e vetingut të prokurorit të Tiranës, Arben Agovi. Prokurori Klodian Braho i cili përfaqëson drejtuesin e SPAK në këtë çështje, parashtroi shkaqet e ankimit që lidhen me kriterin e profesionalizmit. Sipas Brahos, nga verifikimi i çështjeve profesionale, konstatohet se nga ana e subjektit, në mënyrë të përsëritur ka mungesë të ndërmarrjes së hetimeve dhe mbledhjes së provave, si edhe mungesë të arsyetimit logjik në trajtimin e procedimeve penale. Sipas Brahos, shpjegimet e subjektit të dhëna në Komision, nuk janë bindëse.
Ai solli në vëmendje pamundësinë financiare të konstatuar në KPK, që megjithëse e cilësoi të pamjaftueshme për të sjellë penalizim, kërkoi që të konsiderohet nga Kolegji në vlerësimin tërësor të çështjes.
Braho shtoi se këto konstatime do të rivlerësohen pas shqyrtimit të provave dhe shpjegimeve të subjektit gjatë procesit në Kolegj. Ndërkohë, referuar gjendjes së akteve, Braho paraqiti kërkimin e drejtuesit të SPAK, për ndryshimin e vendimit të Komisionit për konfirmimin e prokurorit Agovi dhe shkarkimin e tij nga detyra.
Prokurori Arben Agovi u paraqit në seancë publike së bashku me avokatin Julian Mërtiri, i cili paraqiti në mënyrë të detajuar gjithë kundërshtitë për shkaqet e ankimit.
Mërtiri i cilësoi si formale shkaqet dhe të pabazuara në aktet e administruara. Ai theksoi se veprimet procedurale dhe hetimore të ndërmarra nga subjekti i rivlerësimit gjatë ushtrimit të detyrës janë të rregullta e të plota, gjë që sipas tij, vërtetohet edhe nga vendimet gjyqësore për çështjet objekt ankimi.
Sipas Mërtirit, shpjegimet e subjektit të rivlerësimit për një rast që trajtohet në ankim, kanë qenë jo vetëm bindëse por edhe shteruese, duke detajuar me korrektesë veprimet procedurale të ndërmarra prej tij. Avokati cilësoi si thelbësor faktin se në përfundim të hetimeve, gjykata ka pranuar përfundimisht kërkesën prokurorit Agovi, duke i konsideruar veprimet e tij të plota.
Edhe një tjetër shkak ankimi, Mërtiri e cilësoi të pabazuar dhe kërkoi rivlerësimin e fakteve nga ana e Drejtuesit të SPAK, duke u vlerësuar se veprimet e subjektit të rivlerësimit Arben Agovi kanë qenë determinuese për zgjidhjen përfundimtare të çështjes.
Avokati Mërtiri kundërshtoi dhe shkakun për kriterin e pasurisë, duke u shprehur se nuk është një shkak ankimi i qenësishëm, i bazuar në prova.
Në përfundim, Mërtiri dhe prokurori Arben Agovi kërkuan lënien në fuqi të konfirmimit në detyrë.
Kolegji nuk gjeti elementë të mjaftueshëm në denoncime të depozituara së fundmi ndaj subjektit dhe vendosi të mos çelë hetimin e tyre. Seanca për paraqitjen e konkluzioneve përfundimtare do të zhvillohet më datë 4 nëntor, në orën 13:30.
