Në seancën e ditës së enjte, trupa gjyqësore e përbërë nga gjyqtarët Rexhep Bekteshi, Iliba Bezati, Artan Çupi, Ornela Naqellari dhe Enkel Peza, vendosi unanimisht që të pranojë kërkesën e Nikës dhe të rrëzojë vendimmarrjet e Komisionerit Shtetëror për Zgjedhjet, Iliran Celibashi dhe të Komisionit të Ankimimeve dhe Sanksioneve për mosrrëgjistrimin e tij në zgjedhje.
Kolegji ngarkon Komisionin Qendror të Zgjedhjeve që të zbatojë vendimin e formës së prerë dhe të regjistrojë Nikën si kandidat i propozuar nga zgjedhësit për kryetar të bashkisë Vlorë.
Celibashi dhe KAS e rrëzuan kërkesën e tij me argumentin se nuk kishte ndjekur procedurën e propozimit nëpërmjet një Komiteti Nismëtar.
Nika e komentoi vendimin e Kolegjit si “fitore të drejtësisë mbi presionet politike”.
“Ky vendim vjen pas presioneve të shumta dhe përpjekjeve të hapura nga partitë e mëdha për të penguar një zë të pavarur në garë”- shkruajti ai në facebook.
Nika ishte zgjedhur anëtar i Këshillit Bashkiak nga Partia Demokratike, por vendosi të garonte si i pavarur pasi PD mbështeti një kandidat tjetër të pavarur, Dionis Sota, një sipërmarrës dhe drejtues i shoqatës turistike rajonale “Arta”. Sota mbështetet edhe nga Lëvizja Shqipëria Bëhet.
Përballë dy kandidatëve të pavarur Partia Socialiste kandidon me Brunilda Mersinin, mjeke në profesion dhe ish-drejtuese e Spitalit Rajonal të Vlorës. Për të kandiduar, Mersini dha dorëheqjen nga mandati i deputetes që fitoi në zgjedhjet e 11 majit.
Vakanca në bashkinë e qytetit bregdetar u krijua pasi kryebashkiaku Ermal Dredha dha dorëheqjen dy muaj më parë. Bashkë me Vlorën në zgjedhje të pjesshme shkojnë dhe bashkitë Mat, Tepelenë, Berat dhe Cërrik, ku vakancat u krijuan pas dorëheqjeve të kryebashkiakëve socialistë që u futën në listat e kandidatëve për deputetë ose në përbërjen e qeverisë së re.
