Progres-raporti i Bashkimit Europian për vendet e Ballkanit Perëndimor, i cili u publikua më 4 nëntor, tërhoqi vëmendjen për mangësitë serioze të gjashtë vendeve të rajonit, veçanërisht në ruajtjen e zonave të mbrojtura, mbrojtjen e specieve dhe vlerësimin e ndikimit të projekteve në mjedis.
Raporti i BE-së nënvizoi më tej se këto mangësi kanë sjellë degradim të mbrojtjes së natyrës në Shqipëri.
“Shqipëria nuk ka bërë progres në fushën e mjedisit dhe klimës,” shkruan raporti, duke theksuar edhe nismën e re të prezantuar si “Paketa e Maleve”, si një iniciativë që mund të krijojë probleme me menaxhimin e pyjeve dhe livadheve, duke i hapur rrugë projekteve të mëdha.
Gabriel Schwaderer, drejtues ekzekutiv i fondacionit gjerman mjedisor EuroNatur, tha se qeveritë dhe institucionet e BE-së duhet t’i shohin këto gjetje si “flamuj të kuq” dhe jo thjesht si formalitete.
“Në Shqipëri, ligjvënësit duhet të tërhiqen nga ndryshimet ligjore mbi zonat e mbrojtura të bëra në vitin 2024 dhe nga projektet që prekin integritetin e tyre,” tha Schwaderer.
Raporti përmend gjithashtu ndryshimet në Ligjin për Zonat e Mbrojtura në Shqipëri, ndërtimin e aeroportit të Vlorës në peizazhin e mbrojtur Vjosë-Nartë, si dhe ndotjen industriale në këto zona si tregues të hapave prapa në përafrimin me legjislacionin e BE-së.
Bashkimi Europian u bën gjithashtu thirrje vendeve anëtare për zbatimin e direktivave në lidhje me Zogjtë dhe Habitatet, si dhe për implementimin e rregullave të Vlerësimit të Ndikimit në Mjedis dhe Vlerësimit Strategjik Mjedisor, duke siguruar që të gjitha investimet në infrastrukturë të përputhen me detyrimet ndërkombëtare dhe me pjesëmarrjen e publikut në konsultime.
Viktor Berishaj, oficer i politikave pranë EuroNatur, theksoi se BE-ja duhet ta konsiderojë Kapitullin 27 të negociatave si një kriter të panegociueshëm për integrimin e vendeve të Ballkanit Perëndimor.
“Një vend që nuk mbron dot pyjet, lumenjtë dhe jetën e egër, nuk mund të konsiderohet gati për t’iu bashkuar BE-së,” tha Berishaj.
