Prokuroria e Posaçme, SPAK njoftoi të premten më 14 nëntor se ka thirrur dy herë kryetarin e Partisë Demokratike, Sali Berisha, për ta pyetur lidhur me ngjarjen e 21 janarit të vitit 2011, kur mbetën të vrarë katër qytetarë, pjesëmarrës në protestën e opozitës së atëhershme. Sali Berisha mbante funksionin e kryeministrit kur ndodhi ngjarja tragjike.
Sipas SPAK, janë dërguar dy urdhër-thirrje përmes shërbimit të postës shqiptare, më datë 3 nëntor në adresën e banesës, ku Berishës i është kërkuar të paraqitej në SPAK me datë 7 nëntor dhe po atë ditë është dërguar urdhër-thirrja e dytë për t’u paraqitur të premten, më 14 nëntor.
Berisha nuk u paraqit në SPAK në asnjërën prej datave.
Në njoftimin e SPAK bëhet me dije se urdhër-thirrja e parë e dërguar në banesë është kthyer mbrapsht në Prokurorinë e Posaçme, me shënimin se “Rojet janë autorizuar të mos marrin asnjë zarf”. Pas këtij konstatimi, Prokuroria e Posaçme ka vijuar me dërgimin e urdhër-thirrjes në tre destinacione njëherësh, në banesë, pranë selisë së Partisë Demokratike dhe Kuvend.
Sërish është refuzuar marrja e zarfit të dërguar në banesë, ndërsa Shërbimi i Burimeve Njerëzore dhe Trajtimit të Deputetëve në Kuvendin e Shqipërisë ka njoftuar se marrja në dorëzim e njoftimit është refuzuar nga stafi politik i grupit parlamentar të Partisë Demokratike.
Po ashtu, në njoftim sqarohet se përmes shkresës është sqaruar se njoftimi për urdhër-thirrjen është dërguar edhe në adresën zyrtare të emailit të Berishës, “[email protected]”.
Në përfundim, SPAK bënë me dije se do të vijojë zbatimin e parashikimeve ligjore për njoftimin dhe paraqitjen e Berishës, sipas afateve dhe detyrimeve të parashikuara në legjislacionin në fuqi. Sipas përcaktimeve të Kodit të Procedurës Penale, në rast të refuzimit të urdhër-thirrjeve kur personit që i drejtohet, ka marrë dijeni, atëherë veprohet me shoqërimin e detyruar që mundësohet nga forcat ligjzbatuese.
Gjatë një konference për shtyp, kur u pyet nga gazetarët, Berisha e cilësoi si një gënjeshtër absolute njoftimin e SPAK, në të cilin thuhet se rojet e banesës së tij kanë refuzuar të marrin zarfin. “Është një gënjeshtër absolute. Rojet janë njerëz të përgjegjshëm. […] Janë njerëz që më kanë dorëzuar mua çdo lloj dokumenti që ka ardhur aty. Kur organet gjyqësore e kanë konsideruar, i kanë dërguar me motoçikletë dhe nuk ka ndodhur kjo që thonë ata”, deklaroi Berisha ndërsa shtoi se e-mail-in e parlamentit nuk e hap kurrë, pasi përdor adresën e tij.
Më 30 tetor u paraqit në SPAK për të dhënë shpjegime lidhur me ngjarjen tragjike të 21 janarit 2011, edhe ish-kryetari i Partisë Demokratike, Lulzim Basha, i cili u pyet si person që ka dijeni mbi ngjarjen, në cilësinë e ish-ministrit të Brendshëm.
SPAK regjistroi procedim penal për ngjarjen e 21 janarit të vitit 2011, pasi Gjykata e Lartë vendosi një vit e gjysmë më parë të prishë vendimet e mëparshme të gjykatave dhe urdhëroi fillimin e hetimeve për kallëzimin e familjes Nika ndaj ish-kryeministrit Sali Berisha dhe ish-ministrit të Brendshëm, Lulzim Basha.
Të afërmit e Aleks Nikës, njërit prej protestuesve të vrarë para kryeministrisë në protestën e Partisë Socialiste më 21 janar 2011, akuzojnë Berishën, Bashën dhe ish-komandantin e Gardës së Republikës, Ndrea Prendi se urdhëruan të qëllohej me armë ndaj pjesëmarrësve në protestë.
