Gjykata e Posaçme e Shkallës së Parë vendosi të enjten më 27 nëntor deklarimin fajtor të oficerit të Komisiariatit të Policisë Dibër, Shuip Cami për korrupsion pasiv dhe dënimin e tij me tre vjet burg, që në aplikim të gjykimit të shkurtuar reduktohet në dy vjet heqje lirie. Ndaj Camit është caktuar edhe dënimi plotësues, që i ndalon ushtrimin e funksioneve publike për një periudhë pesëvjeçare.
Fajtor u deklarua dhe i pandehuri tjetër, Flamur Kurti, i akuzuar për korrupsion pasiv, ndaj të cilit u caktua dënimi përfundimtar me 8 muaj burg, që u pezullua dhe u vendos në shërbim prove për 16 muaj. Ndërkohë, është gjetur i pafajshëm i pandehuri Fluturim Bajrami, edhe ky i akuzuar nga SPAK për korrupsion aktiv.
Sipas hetimit të SPAK, i dënuari Cami, i ka kërkuar dhe i ka marrë shtetasit F.K. shumën prej 3000 euro për të favorizuar pozitën procedurale të shtetasit A.Sh. në çështjen penale kundër tij të regjistruar në vitin 2020.
