Një 24-vjeçar nga Azerbajxhani humbi jetën të dielën e 7 dhjetorit, në një anije me flamur panamez të ankoruar në Portin e Durrësit, pasi dyshohet se ra në kontakt me rrymën elektrike gjatë punës si marinar. I riu u transportua menjëherë drejt spitalit të Durrësit, por ndërroi jetë rrugës për në urgjencë.
Pas hetimeve për rastin policia arrestoi kapitenin dhe inxhinierin e anijes, shtetasit me iniciale A. Z., banues në Azerbajxhan, dhe D. L., banues në Gjeorgji. “Ata akuzohen për veprën penale ‘Shkelja e rregullave të mbrojtjes në punë’, pasi dyshohet se nuk kanë respektuar standardet e sigurisë gjatë operacioneve në bord”, thuhet në njoftimin e Policisë së Durrësit.
Ngjarja ka rikthyer vëmendjen te masat e sigurisë në vendet e punës në sektorin detar, ku shpeshherë incidentet ndodhin për shkak të mungesës së standardeve teknike dhe trajnimit të personelit. Grupi hetimor po bashkëpunon me autoritetet portuale për të verifikuar mënyrën e menaxhimit të punimeve në bord dhe respektimin e rregullave të sigurisë.
Rasti i fundit vjen pas disa ngjarjeve të tjera tragjike në Portin e Durrësit gjatë viteve të fundit, ku punonjës kanë humbur jetën në vendin e punës. Në prill të vitit 2022, një 19-vjeçar u godit për vdekje nga një vinç gjatë punimeve të ngarkim-shkarkimit, ndërsa në shtator 2024 një marinar 22-vjeçar humbi jetën në rrethana të ngjashme, duke rihapur shqetësimet për mungesën e standardeve të sigurisë në sektorin detar.
