Prokuroria e Shkodrës njoftoi të premten më 12 dhjetor përfundimin e hetimeve dhe dërgimin për gjykim të një punonjësi të Policisë së Shtetit, kryeinspektorit të Inspektoratit të Mbrojtjes së Territorit, IMT dhe dy inspektorë, të cilët akuzohet se favorizuan ndërtimet pa leje në Vaun e Dejës. Ata akuzohen nga prokuroria për veprat penale “Shpërdorim detyre” dhe “Moskallëzim krimi”.
Referimi në Prokurori për këtë çështje është bërë nga Agjencia e Mbikëqyrjes Policore, e cila kishte siguruar të dhëna se shtetas të ndryshëm në fshatin Pistull dhe Paçram të Njësisë Administrative Hajmel në Bashkinë e Vaut të Dejës po bënin ndërtime pa leje. Po ashtu, janë siguruar informacione se ata po favorizoheshin nga një punonjës i policisë lokale dhe nga inspektorët e IMT.
Të pandehurit janë vendosur nën masën e “detyrimit për t’u paraqitur në policinë gjyqësore” dhe do të përballen në gjykatë me akuzat e moskallëzimit të krimit dhe shpërdorimit të detyrës.
