Prokuroria e Vlorës njoftoi të hënën më 22 dhjetor konfiskimin e pasurive me vlerë mbi 2 milionë euro të një personi të deklaruar fajtor për pastrim parash. Sipas prokurorisë, bazuar në provat e të dhënat e një hetimi të filluar në vitin 2019, Gjykata e Vlorës pranoi kërkesën për deklarimin fajtor dhe dënimin e të pandehurit R.Z., për veprën penale “Pastrimi i produkteve të veprës penale ose veprimtarisë kriminale”. I pandehuri është dënuar me 7 vjet burgim, që në aplikim të gjykimit të shkurtuar ka përfituar uljen e 1/3-ës së dënimit, duke u reduktuar në 4 vjet e 8 muaj heqje lirie.
Po ashtu, është vendosur edhe konfiskimi i disa pasurive të paluajtshme të regjistruara në emër të shtetasit R.Z., të personave të lidhur me të, apo që janë në bashkëpronësi me persona të tjerë. Në njoftim bëhet me dije se janë konfiskuar dy njësi me sipërfaqe totale 120 m2; dy apartamente me sipërfaqe të përgjithshme 351 m2; një shtesë katër kate në bashkëpronësi me dy persona të tjerë; truall me sipërfaqe 105 m2; pasurinë e llojit tokë arë, me sipërfaqe 5000 m2; si dhe një bodrum 181 m2, që të gjitha pasuri të palujatshme që gjenden në Vlorë. Po ashtu, është konfiskuar dhe një automjet në pronësi të të dënuarit për pastrim parash.
