Kryeinspektori i Inspektoratit Vendor të Mbrojtjes së Territorit (IVMT) Sarandë dhe tre vartës të tij janë dërguar për gjykim, të akuzuar se lejuan ndërtime pa leje në zonën e mbrojtur të Parkut Kombëtar të Butrintit.
Prokuroria e Sarandës njoftoi të shtunën, më 27 dhjetor, përfundimin e hetimeve dhe dërgimin për gjykim të çështjes penale ndaj kryeinspektorit të IVMT Sarandë dhe tre vartësve të tij, të akuzuar për shpërdorim detyre.
Sipas hetimeve, në zonën e Ksamilit, në vendin e quajtur “Kanali i Vivarit”, është ndërtuar në një sipërfaqe të konsiderueshme pa leje ndërtimi nga Agjencia e Zhvillimit të Territorit dhe pa kontratë me Agjencinë Kombëtare të Bregdetit. Zona bën pjesë në Parkun Kombëtar “Butrint” dhe ka statusin Monument Natyre.
Prokuroria konstaton se punonjësit e IVMT-së së Bashkisë Sarandë nuk kanë ndjekur procedurat ligjore për konstatimin e plotë të punimeve dhe marrjen e masave administrative, përfshirë vendosjen e gjobave.
Për gjykim janë dërguar edhe shoqëria “Laguna Invest”, e akuzuar për “Ndërtim të paligjshëm” dhe “Pushtim toke”, si dhe shtetasi R.P., ndaj të cilit kërkohet gjykimi edhe për veprat penale “Shpërdorimi i tokës” dhe “Dëmtimi i habitateve në zonat e mbrojtura mjedisore”.
Kryeinspektori i IVMT-së së Bashkisë Sarandë, A.M., dhe vartësit e tij E.Z., B.K. dhe V.X. akuzohen për veprën penale “Shpërdorim detyre”.
