Prokuroria e Fierit njoftoi të dielën më 28 dhjetor përfundimin e hetimeve dhe dërgimin për gjykim të çështjes penale në ngarkim ish-drejtorit dhe gjashtë specialistëve të Agjencisë Rajonale Mjedisore Fier, Vlorë e Gjirokastër, për veprën penale “Shpërdorimi i detyrës”, pasi akuzohen se kishin miratuar dhe refuzuar leje mjedisore në kundërshtim me ligjin dhe duke neglizhuar rekomandimet e Kontrollit të Lartë të Shtetit, KLSH.
Sipas prokurorisë, nga hetimet ka rezultuar se ish-drejtori i këtij institucioni, Arben Voja dhe gjashtë vartësit e tij, duke vepruar ose mosvepruar në kundërshtim me ligjin, në mospërmbushje të detyrave funksionale, si dhe duke neglizhuar konkluzionet e auditimeve të brendshme të Ministrisë së Mjedisit e rekomandimet e KLSH-së, kanë miratuar dhe refuzuar leje mjedisore të tipit “C” në kundërshtim me ligjin. Këto veprime të paligjshme janë realizuar pa kryer verifikime në terren dhe pa respektuar kriteret ligjore dhe nënligjore.
Në njoftim bëhet me dije se disa leje mjedisore të tipit “C” ishin miratuar në mungesë të dokumentacionit të detyrueshëm që kërkohet nga ligji dhe aktet nënligjore; si dhe janë konstatuar standarde të ndryshme vendimmarrjeje, duke favorizuar disa subjekte dhe penalizuar të tjera pa bazë ligjore. Një numër i konsiderueshëm i subjekteve të pajisura me leje mjedisore nuk kanë dorëzuar raportet e detyrueshme të vetëmonitorimit, ndërkohë që nga ana e Drejtorisë Rajonale të Mjedisit Fier nuk është kërkuar pezullimi apo revokimi i lejeve, ashtu si e parashikon ligji. tjetër paligjshmëri e konstatuar prej hetuesve është edhe mungesa e vjeljes së tarifave vjetore të lejeve mjedisore, duke shkaktuar një dëm ekonomik për buxhetin e shtetit në vlerën mbi 3 milionë lekë për vitet 2017–2019.
Nga hetimet ka rezultuar se për vitin 2017 nuk kanë likuiduar këtë tarifë 424 subjekte në shumën 848 mijë lekë, për vitin 2018 janë konstatuar 421 subjekte në shumën 842 mijë lekë dhe për vitin 2019 nuk kanë likuiduar tarifën 702 subjekte në shumën 1.4 milionë lekë.
