Fotot e vitit 2025 përmes objektivit të Nensi Bogdanit përshkojnë një Shqipëri të vendosur në kryqëzimin mes krizave globale, tranzicioneve politike dhe betejave sociale të brendshme: nga refugjatët afganë dhe emigrantët e Lindjes së Mesme të strehuar përkohësisht në Shëngjin si pasojë e marrëveshjeve me SHBA-në dhe Italinë, te ceremonitë mortore për Kryepeshkopin Anastasios Janulatos që bashkuan figura publike dhe besimtarë në Tiranë; nga samiti i Komunitetit Politik Europian nën shi në sheshin Skënderbej dhe simbolikat elektorale të pushtetit, te zgjedhjet parlamentare të Majit të shënuara nga pjesëmarrje e ulët; nga parada PRIDE dhe protestat për Palestinën, te reagimet qytetare për shëndetësinë, lirinë e medias dhe kërkesat për llogaridhënie politike, këto imazhe ofrojnë një panoramë të ngjeshur të një viti të trazuar, ku politika, feja, aktivizmi dhe pasiguria sociale ndërthuren në jetën publike shqiptare.
Që prej vitit 2021, mijëra shtetas afganë të cilët u larguan nga vendi i tyre, pasi ky i fundit ra në duart e talebanëve, po strehohen në Kompleksin Rafaelo në Shëngjin, si pjesë e një marrëveshje me SHBA-në për t’i mbajtur ata përkohësisht në Shqipëri. Shëngjin, Lezhë. Janar, 2025.
Kryepeshkopi i Tiranës dhe Shqipërisë, Anastasios Janulatos, mbylli sytë përgjithmonë në Janar të 2025, dhe u përcoll për në banesën e fundit me një ceremoni lamtumire në Katedralen Ortodokse të kryeqytetit. Tiranë, 31 Janar 2025.
Anija “Libra” me emigrantë nga Lindja e Mesme mbërrin në portin e Shëngjinit për të dorëzuar refugjatët në qendrat e pritjes të ngritura në Shëngjin dhe Gjadër, sipas marrëveshjes së Shqipërisë me Italinë. Kjo marrëveshje parashikon që Shqipëria të strehojë emigrantët e vendeve të treta që kapen në ujërat midis Italisë dhe Shqipërisë, deri në momentin kur Italia të vendosë mbi dhënien e azilit ndaj tyre ose jo.
Liderët e Europës dhe Ballkanit Perëndimor pozojnë për foton familjare të samitit, teksa shiu i dendur bie përgjatë ditës së Samitit të Komunitetit Politik Europian që u zhvillua në sheshin Skënderbej në Tiranë më 16 Maj 2025.
Një aktiviste valëvit flamurin për të drejtat e komunitetit LGBTIQ+ gjatë paradës së përvitshme PRIDE në bulevardin kryesor të Tiranës.
Figura publike dhe personalitete të vendit morën pjesë në ceremoninë e lamtumirës për Kryepeshkopin Janullatos, në Katedralen Ortodokse Ringjallja e Krishtit.
Një votuese duke hedhur fletën e votimit në një prej qëndrave të votimit në kryeqytet. Vetëm 42% e popullsisë morën pjesë në zgjedhjet parlamentare të MAJIT 2025 në Shqipëri.
Atletet e kryeministrit Rama me yllin e fushatës zgjedhore të PS, që simbolizon anëtarësimin e Shqipërisë në BE deri në 2030, në tapetin e kuq që priti 47 liderët e Europës në Tiranë gjatë Samitit të Komunitetit Politik Europian.
Sinjali i televizionit News 24 u bllokua për pothuajse 10 ditë në fillim të muajit Gusht 2025, teksa zyrat e redaksisë së grupit mediatik “Focus Media News” u mbyllën me urdhër të Policisë.
Qindra qytetarë protestuan për lirinë e Palestinës në Sheshin Skënderbej, në një protestë të thirrur nga aktivistja ndërkombëtare për drejtësi sociale Greta Thurnberg në Tiranë.
Dhjetëra tullumbace të zinj shihen prapa kamerave të operatorëve që raportojnë pranë Ministrisë së Shëndetësisë. Këto tullumbace u vendosën nga protestuesit në shenjë proteste për gratë që vuajnë nga kanceri i gjirit, të cilave u mungon trajtimi i duhur në Spitalin Onkologjik. Nën moton “Tetori i Zi” protesta shërbeu për të ngritur zërin për të gjithë pacientët me kancer që nuk marrin shërbimin e duhur nga shteti.
Në një protestë të zhvilluar përballë Kuvendit, qytetarë dhe aktivistë kërkojnë vënien e zv-kryeministres Balluku përpara drejtësisë, pasi SPAK ngriti një sërë akuzash ndaj saj dhe kërkoi heqjen e imunitetit si deputete.
